Van die rebelheit der Vriesen, ende van den twedracht tusschen coninc Willem ende dye stadt van Uutrecht.
Dat XXVI capitel.
Nu heeft coninc Willem alle saken den rijke angaende wijslic ende wel beset, ende meent weder in Ytalien te riden om die keyserlicke benedictie te ontfangen, gelijken die paeus an hem gescreven ende begeert hadde, vernam hij tidinge dat die West-Vriesen begonnen te rebelleren ende na hoere oude gewoenten ongehoersaem te worden, ende togen in Hollant, ende haelden aldaer enen groten roef; want si geen wederstoet en meenden te vinden, omdat die coninc verde uuten lande was. Doe dochte die edel coninc in sijns selfs sin: wat soude dat dienen, dat ic soude trecken te Romen of in vreemden landen, ende die dwingen, ende mijns selfs lant onbedwongen ende ongevreet laten bliven; ende hierom heeft hi Ytalien laten staen, ende is weder nedergecomen, om dye Vriesen te bedwingen, menende dairna in Ytalien te riden om die keiserlicke crone; ende is haestelic mit starcker macht tot Uutrecht gecomen, ende dede vergaderen alle die prelaten van der kercken in Sinte Marien hof, om hem te helpen raden ende te wisen een bequame stede, dair hi een capelle in die ere van Sinte Jorijs op mochte doen maken. Ende als die coninc dus sat mitten prelaten in bliden geselscappe, quam daer een bedroever des vreden, ende warp al verde int heimelic mit enen kezelsteen an des conincs hoft een grote wonde, dat den prelaten een grote scande was, want si hem dair ten eten hadden. Die coninc nam den steen in zijn hant ende sprac tot hen allen aldus: 'Eersame vaderen, nu merckt wat smadenis ons dese van Uutrecht doen, die ons begeren doot te werpen mit stenen, sonder enige verdient, dien wi tot nu toe in hoir hulpe hebben geweest ende hebben hoir vianden op ons selfs cost mit arbeyde hem onderdaen gemaect. Mer leeft God ende sine martelaer Sinte Jorijs: so en sal dese smadenisse niet ongewroken bliven des wi een jaer gesonts lijfs mogen leven!' Ende mit desen woirden sceyde hi van hen luyden, ende sat sonder merren op zijn paert, ende ontseide rechtevoert die stat, ende bereide al dat hi mochte om die stat te verderven. Die burgeren van Uutrecht, die om dit ongheval al te seer bedroeft waren, verworven geleide an den coninc, ende senden hoer burgermeesteren in Hollant in Den Hage, of si enighe vrienscap mochten vercrigen an den tornigen coninc. Mit corten woerden: dye coninc gaf hem een corte sentencie, die hi niet veranderenGa naar voetnoot290 en woude, ende sprac, hi woude die stat slechten neffens der aerden, of si souden hem leveren den man diet gedaen hadde. Hiermede keerden dye van Uutrecht in der stat, ende versameden horen raet, ende ondersochten als si heimelicste mochten so desen quadader te vinden, opdat si des conincs toern in eniger manieren besaten mochten. Dit bleef aldus staende, omdattet den coninc ernste was op die Vriesen te trecken, dair die stat Gode wel of dancken mochte; want waer hi te live gebleven, twaer gevreest geweest soude die een steen opten anderen gebleven hebben.
Auteursrechtelijk beschermd