Hoe die coninc overberch reet bi den paeus tot Genuen.
Dat XXIIIIGa naar voetnoot286 capittel.
Die paeus Innocencius de IIII vernam dese ende andere goede maren van den coninc, daer hi hem sere in verblide, ende sende een cardinael in Hollandt an hem mit sinen brieven, sprekende aldus:
Innocencius, bisscop, knecht der knechten Goeds, onsen eersamen zoen Willem den Roemschen coninc, salicheit ende der apostelen benedictie. Nadat die Godlike cracht zijn kercke woude in vreden setten, so heeft hi zijn grootheit getoent een openbaer teyken der doecht, in den wege daer du mit gelucke in gaeste ende regneerste. Want nae Coenraet, die wileneer keyser Frederijcs soen was, van deser werlt gevaren is, ende nu nyemant gebleven en is, die dijn voertganc wederstaen mach, des di God genadich si; so zijn wij dijnre grootheit vermanende mit vaderlicke vermaningheGa naar voetnoot287, ende raden di, dattu alle sware onlede afterlates, ende bi rade ons liefs zoens Pieters totten Gulden Zeyl, diaken cardinael ende legaet des Stoels van Romen, bereide di te comen in Ytalien in coninclicker manieren; ende haest di te versoeken die kercken der apostelen in Goeds geleide, op dattu hoechlicken mogeste ontfaen die keiserlicke crone des Heiligen Rijcks minen handen, opten dach dat ons Heren gheboerte was naestcomende. Ghegheven tot Rome, etcetera.
Om deser vermaningen wille besaten ende bereide hem coninc Willem over berch te riden als pelgrom, ende nam mit hem XII goede edele mannen, ende dede voersorgen overal opten wege in Ytalien ende anderswaer dat hi mit gemake ende sonder scoffiericheit tot Genuen quam bi den paeus, daer hi mit groter waerdicheit ende eren van den paeus ontfangen wert, ende hilt hem een stucke tijts bi hem mit feestelicken gheselscappe. Daer wesende vercreech hi voerden abt van Egmondt dat hij ornamenten dragen mochte als mijtreGa naar voetnoot288, staf ende vingerlinc, gelijc enen biscop, mit meer andere privilegien, gevende daerof enen bulle.
Auteursrechtelijk beschermd