Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dit oerloch tusschen den coninc ende die gravinne ghesoent wert.
Dat XXIII capitel.

Als Margriete, gravinne van Vlaenderen, dit vernam, dat coninc Willem grave Kaerlen aldus gevolcht is, ende voervluchtich geworden is, ende binnen Valencijn gecomen was, werdt si droevich, ende namt alte seer qualicken dat hoir die avontuer aldus starc tegenviel. Die seer beladen was, dat was si; doch si was weinich te beclagen, want sijt selve wel uut groter hoemoet gebrouwen hadde. Nu en weet si wat beghinnen, want horen raet was nu ten eynde gecomen; si beclaechdet verlies van horen volcke, ende grave Kaerl, dair si hoir meende mede te

[p. 172v]

wreken, was hoer ontvloden, ende bleef nochtans in groter viantscap mit coninc Willem. Sodat si ten lesten, omdat si niet bet en mochte, versoeken dede mit mogende heren ende princen an coninc Willem, of hij wel doen woude, ende sijn genade tot hoer keren, si woude doen so wes sy mit reden doen mochte. Die coninc bedacht hem, al wast dat si hem veel smaetheden ghedaen hadde, hi en woude om eens wijfs wille hemselven niet over geven²⁸⁴ ende nam se uut zijnre edelheit tot ghenade, mit goeden voirwaerden, dye si voer doen moste, ende waren dese: Si most eerst een ofstal ende vertichtinge doen van den lande van Henegouwen, van den lande van Aelst, ende van den lande van den IIII ambochten, ende die grave Jan van Avennes, horen outsten soen overgeven²⁸⁵ mit horen goeden bezegelden brieven. Ende als dit al vast ghemaect was na des conincs wille, toech hi weder in Hollant. Dat coninc Willem voer Valencijn lach, ende grave Jan van Avennes ende sijnre suster kinder weder opten horen brochte, die ewelicken van den lande van Henegouwen onterft gebleven souden hebben, dat gheschiede in den jare Ons Heren M CC ende LIIII. Onder desen, dat coninc Willem van Valencijn gescheyden was, quam hem die bootscap onderwegen ende een goede mare, dat hem een soen geboren waer, daer hi hem sere in verblide, ende dancte Gode hoechlicken van dien. Hi quam thuys, ende dede sinen soen dopen ende noemen bi name Florijs, na sinen vader.

284 genen AB.

285 overgenen AB.