Van den grote victorie die die biscop hadde tegen die Gelresse.
Dat XIX capittel.
Des anderen dages, als die zonne opgegaen was, nam dye coninc oerlof an den biscop ende die heren van der stat, ende is weder in Hollant gereyst, overmits enige saken te expedieren den Rijcke angaende. Ende want grave Otte van Gelre hyer voertijts met desen twe ridderen van Aemstel ende van Woerden een aliancie ende verbant te samen hadden gemaect teghen den biscop van Uutrecht, ende hadden dit bisdom mit roven ende branden sere verwoest ende infesteert, waerom de biscop mit groot volc van wapenen wederom toech in die Velue, ende verbrande vele dorpen, ende nam daeruut enen groten roef. Die ridderen ende gemeene luden van den steden ende dorpen des lants van Gelre versameden byeen ende quamen mit groter menichte om den biscop den roef te benemen ende enen strijt mit hem te vechten. Mer die biscop als een onversaecht vroem prince sette hem daertegen, ende ging hem stouteliken tegen mit ontwonden bannieren ende groten gecrij; ende heefter veel verslagen ende gevangen, ende is met al den rove ende gevangen mit groter eren ende zege weder in der stat gecomen. Ende van desen gevangen creech die biscop also groten scat van goet ende ghelt, dat hi daermede dede tijmmeren dat slot te Vredelant, daer hi den here van Aemstel mitten omgeseten buyren ende lantluden mede dwingen mochte van hoerre gewoenlicke rebellicheit ende anvechtinge. Nu willen wi weder keren op die gesten ende feyten van wapenen die coninc Willem voert binnen sinen tiden bedreven ghehat heeft.
Auteursrechtelijk beschermd