Van here Goeswijn van Aemstel die XXXVII biscop tot Uutrecht.
Dat XVI capitel.
Biscop Goeswijn van Aemstel.
Goeswijn van Aemstel, proest van Sinte Johans tot Uutrecht, wert nae biscop Otte eendrachtelic gecoren die XXXVII bisscop van Uutrecht. Hy was een simpel man, die niet veel besorcht en was om der kercken saken, waerom dat bisdom in corten tiden seer verstoert ende gebroken wert, dat wilen eer bi biscop Otten tiden so sere verhoget was geweest. Die mannen ende besorgers van den bisdomme die des bisdoms saken oerbaer ende welvaren anmercten, vergaerden een generael capitel, opdat si ghemeen sprake hebben mochten van den oerber des bisdoms. Ende tot desen capitel quamen die edele coninc Willem van Romen, here Peter de Caputio, diaken cardinael; here Conraet van Hoesteden, aertsbiscop van Coelen. Ende in deser heren teghenwoerdicheit stont here Goeswijn van Aemstel, ende resigneerde, ende gaf over in handen des conincs ende des cardinaels dat voerseide bisdom. Ende dese here Goeswijn hadde dat bisdom berecht omtrent II jaer.
Auteursrechtelijk beschermd