Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die grave van Ghoer tot subjectie des biscops ghebrocht wert, ende hoe biscop Otte starf.
Dat XV capittel.

In desen tiden claechde biscop Otte van Uutrecht mitter gemeen ecclesie den Roemschen coninc over den grave van Goer, dat hi hem onrecht dede, ende vercorte in sine landen ende luden. Waerom die coninc dede desen grave van Goer voer hem cijteren ende dagen te recht te comen ende verantwoorden sine saken. Mer dye grave verachte des conincs bode, ende en woude overmits onwaerdicheit ende hartheyt niet comen, ende maecte sijn reise anderswaer. Doe die coninc dit²⁷⁴ vernam, die op die tijt binnen Uutrecht was, lyet hem sine wapen ende harnasch andoen voer Sinte Martijns outaer, ende reet sonder merren, ende ving den grave, ende verwoeste zijn lant, verdrivende sine luden ende lantsaten; ende is met groter zege weder binnen der stat van Uutrecht gecomen, ende gaf den biscop den gevangen grave, ende benam hem mit recht ende vonnisse de waerdicheit zijns naems, dat men hem geen grave meer noemen en soude. Ende hierna ist gevallen, dat dese eersame vader in Gode, here Otte van Hollant, biscop van Uutrecht, des conincs oem, vol goeder werken ende daghen of-

274 die AB.

[p. 169r]

livich geworden is op dye II nonas van aprille int jaer Ons Heren M II C ende XLIX, ende wert mit betameliker uutvaert in der Domkercke begraven mit groter eren, by den anderen II Otten, nadien hi dat bisdom in groter vreden, eren ende mogentheit hadde berecht XVI jaer lang; datwelcke hy vant benaut, belast ende beswaert mit menigerley sculde, ende liet dat sine nacomelingen ombelast ende ombecommert, in groter eren ende rijcdomme.