Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van der groter blijscappen des paeus ende cardinalen van der electien des nijewen gecoren conincs.
Dat VI capitel.

Onder desen screef die cardinael den paeus hoe dat alle ding gesciet was. Als den paeus dese tidinge quam, verblide hi hem daerin, ende screef sinen dispensier enen brief, inhoudende aldus: Innocentius, biscop, knecht der knechten Goods, den rectoer van Sinte Marien in Cosmidrip, salicheit, ende der apostelen benedictie! Sone, verblye mit ons die bekenste te voelen een levende lichaem mitten hoofde dat wi dy blideliken scriven dat bekenne blideliken, dat op die vijfte nonas van october in den hof dye bi Coelen hochliken versaemt was onse lieve zoen in Gode grave Willem van Hollant, mit gemeenre begeerten der princen die recht hebben an den keyser te kiesen, daer hem die ander princen in verbliden, is gecoren in enen Roemschen coninc, dat wy openbaerlic weten bi brieven desselven conincs ende ons zoens Peter tot Sinte Jorijs ten Gulden Zeyl, dijaken cardinael, dattu biscop van deser oerberliker saken die men bilixs hebben sal, dat dine vroechde oec te meerre si om dese persoen, die nyewes gecoren is. Want dese coninc also ons dese cardinael ontboden heeft ende mede die gemene mare oercont, so is hi een ghetruwe gelovich man, wijs van sinne, vroem van ridderscap, mogende van sijns selfs cracht ende veelre princen mage ende swager; hi is mede jonc van jaren, redelic van ondervinden, bequaem van zeden ende van allen lichaem behagelic, waerom wy hopen in Gode dat dese coninc sal onder die voete treden alle dengenen die den kerstenen liden an doen, ende den quaden castien van haerre ondaet; ende dat cortelicken dat kersten gelove die vrede der Heyliger Kercken, rust der ghemeenre werlt, ende die staet der ghelovigher luden sal bi der hulpen Goods by desen man groteliken verheven worden, want alle die meeste van den lande hebben desen ghecoren tot horen hoefde onderdaen te wesen. Dit spreect ende ontbiet alle die getruwe, dye du weeste, die hem om onser tidingen verbliden sullen, etcetera.