leyde, ende hoe hi die wan.
Dat VII capitel.
In desen tidenGa naar voetnoot266, als dye gecoren coninc in blijscappen sat ende hadde III daghen feest ende hof gehouden, doe dede hi gebieden des IIII dages, des morgens, mitter sonnen opganck, dat men die tenten ende pauweljoenen vellen soude ende trecken voer die stat van Aken, om die al omme te besitten. Die van Aken vernamen dit, ende haesten hem ter vaert hoer poerten te sluten ende te besetten, ende sonder enich letten is die coninc mit veel ridderscaps gecomen voer die stat van Aken, ende heeft zijn tenten al omme daer doen slaen. Daer een alten wonderliken teiken gesciet is in deser manieren: ter wilen dattet belegge duerde, Bonifacius biscop van Lusanen, wesende in zijn gebet bi den camer onser Vrouwen Marie int cloester, sach in den gheest een gewapent ridder met witten gecleet, sittende op enen witten henxst, hebbende een lancie in zijn hant, ende alle die hem volchden waren mit gelike witte wapenrocken gecleet. Dit siende dese heilige biscop dochte in hemselven, seggende aldus: 'O mijn Heer, mijn God, wie is dese ridder ende warwerts gaet hy?' Dye engel des Heren antwoerde des biscops gedachten, ende seide aldus: 'Dit is Sinte Jorijs, Goods ridder ende martelaer, dien God coninc Willem van Hollant te hulpen geseynt heeft; ende sal opten dach van huden victorie vercrigen, ende doer Sinte Jorijs geleyt worden in der stat van Aken.' Dwelc also gesciet is. Dit leest men in des biscops leven voorseit, die in dat cloester van der Oerden van Cistercien bi Brusel begraven leyt. Als nu des conincs tenten opgeslagen waren, heeft hi alle sine heren ridderen ende knechten by hem ontboden, ende hadde heimeliken raet mit hem, hoe men enigherhande werc mochte visieren, daer men dye keyserlike stadt mede winnen mochte sonder veel scaden; daer overdragen wert by subtijlen wercluden dat dat gemeen volc soude tesamen draghen veele aerde ende maken enen hoghen dijck, die den stat al omme beslote; ende want si gheleghen is tusschen berghen in enen dale, daer vele swaveliger wateren sijn, ende clare fonteinen, die die stat overvloedich van wateren maken, soe wert dat water altoes meerder wassende, om dattet mitten dijcke ghestoppet was, ende sinen ghanck nyet hebben en mochte. Ende wert te hans alsoe groot, dat dye burghers uut horen husen niet comen en mochten sonder schepen. Ende doe die burghers saghen dat si aldus verladen waren mitten water, overdroeghen mitten coninck, ende deden hem der stat poorten open sonder enich wedervechten, ende ontfinghen hem voer horen here, opdat hy den dijck dye daeromme gheslaghen was weder brake, ende dat water sinen ghanck hebben mochte, alst ghewone was te doen. Ende nae deser overdracht dede dye coninck den dijc breken, ende quam aldus binnen der stat opten lesten dach van october. Daer wert hy van allen den burgheren vriendelick ontfaen.
Auteursrechtelijk beschermd