Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 165r]

Van Willem die II, ende was die XV grave van Hollant, Zeelant ende Vrieslant.
Dat II capitel.

Willem, die anderde van dijer name, worde nae sijns vaders²⁵⁸ doot dye XV grave van Hollant, Zeelant ende heer van Vrieslant. Hi was een kint van VI jaren doe sijn vader verslagen wert; waerom dat biscop Otte van Uutrecht, sijn oem, nam hem in sijnre hoeden ende voechdien, totdat hy tot sinen jaren gecomen was. Dese Willem is geboren geweest in die camer van Hollant, dat is in der stede van Leyden, die doe alsoe hiete; ende dat fondt, daer hi in gekerstent ende gedoept wert, staet noch in Sinte Pieters kerc aldaer. Ende als de joncheer Willem tot sinen jaren gecomen was, nam hi te wive²⁵⁹ een scone maecht des hertogen dochter van Bruynswijc, geheten Elisabeth, daer hi enen zoen bi hadde, geheten Floris, die na hem grave wert. Dese edele vrome jonge man beminde meer alle dye dagen sijns levens die wapenen dan dat rode blinckende gout.

258 waders AB.

259 wine AB.