Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier begint die XVIII divisie, ende heeft XXVIII capitelen.

Paeusen.
Anno M II C XLI.
Dat I capittel.
Paeus Celestinus.

Celestinus die Vierde was dye C LXXXVIII paeus, van Meylanen, ende sat niet langer dan XXII dagen. Hi sant an den keyser legaten, dat hi ofstaen soude dat lant van IJtalien nyet langer te destrueren, ende dat hi die cardinalen, die hi gevangen hadde, ontslaen soude; mer geen van allen en dede hi. Ende hyerenbinnen starf dye paeus, waerom dye keyser den cardinalen te langher ghevanghen hylt, omdat dye verkiesinge van den paeus te langher vertrecken soude. Ende binnen desen tiden wert IJtalien seer verwoest ende verderft. Ende die Romeinen sorchden oec seer dat hy te Romen comen soude, ende winnen dye stat. Nae sijnre doot stont die paeus stoel ledich een jaer ende IX maenden.

[p. 164r]

²⁴⁸

Innocencius die IIII was die C LXXXIX paeus, van Genuen²⁴⁹, ende sat XI jaer III maenden. Ende als die keyser Frederick²⁵⁰ dit vernam, was hi des nyet wel te vreden, ende sprac: 'Ic hebbe mijn vrient verwandelt in enen viant.' Want doen hi cardinael was, was hy des keisers vrient; mer nu woude hi bescermen der kerken vriheden, ende dede veel om den keyser tot enicheit ende kennisse te brenghen. Mer als hi vernam dat die keiser hem lagen leide, reisde hi van Romen te Genuen, ende van daer in Vrancrijc tot Lijons, daer hi een consilije vergaerde, ende verdaechde den keiser daer te comen. Ende als hi nyet en quam, soe dede hem dye paeus in den ban, ende setten van tkeyserrijc, ende absolveerde allen heren ende steden dye hem hulde ende eedt hadden gedaen. Ende dit was int jaer Ons Heren M II C ende XXXIII. Daer brochten ende geleyden hem de Fransoysen te Rome, ende toech voert tot Napels, daer hi starf; ende wert tot Sinte Laurens begraven te Romen.

Alexander die IIII was die C XC paeus, uut Campanien, ende sat VII jaren²⁵¹. Hi hadde veel oerlogen tegen Manfreet, keyser Fredericxs bastertzoen, die hem onderwant des conincrijxcs van Sicilien, ende dede hem in den ban; mer hi en achtes niet. Ten lesten²⁵² als hi gecomen was tot Viterbien om paeys ende vrede te maken tusschen den Venechianen ende Genuerses is hi daer gestorven, ende wert tot Romen gevoert tot Sinte Laurens, daer hi begraven wert; ende dat paeusdom vaceerde III maenden ende III dagen.

248 C LXIII AB.

249 Gennen AB.

250 Fredelick AB.

251 ontbr. AB.

252 aldus C; ontbreekt AB.