Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van justicie ende doot die desen Roelof, den castelein, anghedaen wert.
Dat VIII capittel.

Hierna, in den jaer Ons Heren M II C ende XXVIII, als alle marasschen ende broeclanden harde mitten yse ende snee bevroren waren, ende men overal reysen mochte, toech de biscop mit enen machtigen heer in der Drenthen

[p. 161r]

lant, ende meende dat hi des anderen daghes voer tslot tot Coeverden trecken soude, om dat te bestormen ende mit crachte te²³³ winnen; mer dit opset ghing te niet, want in derselver nacht quam groot wint ende reghen, waerbi dat dat ijs ende snee te niete ghing, ende al dat heer moste van nootsweghen afterwaerts wijken, ende lieten alle hoer instrumenten ende artelrije daer bliven; ende die biscop predicte van nijewes des paeus oflaet, ende sende in Vrieslant om hulpe ende volc van wapenen. Ende als die zomer anquam, vercreech dese Roelof een bestant van XV dagen lang, ende beloofde tot dier abten segghen in Vrieslant te onderhouden alsulken uutsprake ende seggen van allen misdaden dye tusschen den biscop ende hem tot deser tijt toe geweest hadden. Gedurende dit bestant van XV daghen, quam Roelof opt casteel van Herdenberch, ende woude mitten biscop spreken ende tracteren van den paijse ende zoene. Die biscop verwonderde hem seer als hi desen Roelof sach, ende seyde hoe hi so stout ende vermetel ware boven alle andere sine vianden te comen alleen mit enen dienre in zijnre presentie. Daer namen dye borchsaten ende die gemeente van Hardenberch desen Roelof tegens des biscops danck ende wille, als een onwettigen ende verbannen man, uut des biscops camer, mit Henric van Gravesdorp, ende brochten hem beneden int slot, ende setten se beyde al levende op raden, ende andeden hem menigerley pinen, als moerdennaers ende straetrovers, waerom dat volc in den Stichte van Uutrecht began tegen malcander op te staen, also datter scheen dat si malcanderen souden slaen of verbarnen; waerom dese biscop tot Uutrecht quam, ende dede daer openbaerlic sinen onscult voer alle den volke. Ende overmits hulpe grave Floris van Hollant maecte hi vrede ende vrientscap tusschen sine twistende mannen ende²³⁴ dienres.

233 ee AB.

234 dnde AB.