Hoe dat Roelof de casteleijn in dat slot tot Coeverden verradelic weder innam boven den vrede voerseit.
Dat VII capittel.
Roelof bedroefde hem sere dat hy den biscop aldus zijn slot overgegeven hadde, ende dat hi van sine officie ende droetsaetscap van den landen van Drenthen beroeft was, corrumpeerde ende verwillichde hi enen dienre van den slote om enen sekeren zomme van penningen, dat hi hem dat slot tot enen bequamen tijt verraden ende leveren soude. Niet langhe hyernae stelde hem dese Roelof mit een menichte van gewapende luden omtrent den dorpe van Coeverden, niet verde van den slote, ende dese verrader hadde alle den meesten hoop van den zoudenijers mit loesheden ende behendichede beneden den slote int dorpe gebrocht; ende soe geringe als sie of waren, stont dese Roelof op van sinen lage ende begreep die brugge van den slote, ende quam daerop, ende sloech se al doot de hi daerop vandt, ende besette dat doe wel starck mit sinen knechten ende zoudeniers. Die biscop dit vernemende was harde sere gestoort ende gram van den verliese van sinen slote, dat hi verloren hadde, ende geboet dat casteel tot Hardenberch daertegen te besetten, ende ordineerde een generale heervaert teghen den casteleyn ende die van Drenthen.
Auteursrechtelijk beschermd