Van den wrake die over des biscops doot wert ghedaen.
Dat VI capitel.
Als nu dese biscop Willebrant in sine biscops zetel introniseert ende gheset was, ginc hi sitten te rechte binnen der stat van Uutrecht, daer die hoge mannen der kercke van Uutrecht mit recht ende mit vonnisse wijsden dat die grave van Gelre mitten anderen gevangen vrij ende loss wesen souden van der vangenissen des casteleins van Coevoerden, want dieselve casteleyn als een verbannen man overdadich ende onwittich sinen rechten lantshere den biscop mit enen onwaerdigen ende smadeliken doot zijn lijf hadde benomen. Doe versamede dese biscop beyde van zijns selfs macht ende mede uut Vrieslant, overmits denGa naar voetnoot231 oflaet die die paeus daertoe gegeven hadde, een machtich groot heer van volc, dewelke hi teghens die van Coevoerden ende den Drenthers deelde in ses battaelgen; ende daertegens setten dese voerseide Drenters oec ses battaelgen, daer si den biscop mede wederstaen wouden, ende besetten die palen ende die frontieren van haren lande also vast ende starc, dat men zonder grote scade niet wel in haer lant comen en mochte. Mer dese biscop als een onversaecht prince quam tegens sine vianden van allen siden, ende sloech daerin so vreseliken, datter mit allen vele doot bleven; ende verbrande vele dorpen, ende vervolchde dat vliende volc al totter doncker nacht toe. Des smorgens vroe, als die sonne opgegaen was, quamen die van Coeverden mitten Drenthen, dye seer ontsagen des biscops mogentheit, ende gaven hemselven in des biscops genade, ende gaven hem gijsele, ende hi ontbant se van den banne ende maledictien op deser conditien: Als dat Roelof die castelein den biscop vri ende eygen over leveren soude dat slot te Lare ende dat slot te Coevoerden mit alle recht ende jurisdictie van der Drente, ende soude noch betalen den biscop III dusent marck voer alle scade de hi gedaen hadde; ende noch soude hi senden C vrome mannen in Lyflant om te vechten mitten Duitschen heren op die heyden, ende soude noch fonderen ende stichten een vrouwencloester van XXV provens van Sinte Benedictus oerde tot Swartewater bi Swolle. Dit gedaen zijnde, dede die biscop dat slot te Lare ten gronde toe ofbreken, ende dat slot te Coeverden besetteGa naar voetnoot232 hi met sinen volcke, ende dede dat trouwelic bewaren. Ende hi dancte alle sine hulperen, heren ende ridderen ende knechten hoechlicken, ende begaefde se mildeliken, ende beval se Gode; ende hi reet vandaen tot Uutrecht mit groter eren tot Sinte Martyns feeste.
Auteursrechtelijk beschermd