Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van here Willebrant, die XXXV biscop van Uutrecht²²⁹.
Dat V capittel.

Als bisscop Otte dus jammerlicken vermoert was ende begraven, quam grave Florys van Hollant mit meer andere vasallen ende princepale dienstmannen der kercken tot Uutrecht, ende bad voer sinen neve, here Willebrant, biscop van Padeborn, ende was des graven zoen van Oldenburch, dat men hem tot enen biscop van Uutrecht kyesen woude. Ende als alle die heren vergadert waren om hem te beraden op des graven supplicatie ende bede, ende siet, die grave van Gelre ende die here van Aemstel, de beide ter doot toe waren gewont ende een corte uutsettinge hadden vercregen van der vangenisse, worden gedragen op hoer bedden leggende, ende gebrocht int Generale Capitel ende baden der ecclesie al wenende om succoers ende bistant te comen uut hoere vangenisse. Ende als men dese heren sach dus jammerlicken gewont, worden alle die heren bitterlic screyende; ende den rouwe van des biscops deerliken doot wert weder vernijewet, als geen wonder en was. Waeromme dat si gemeenlic coren desen here Willebrant, biscop van Padenborne, als een bequaem man desen onnoselen ende smadeliken doot te wreken, te wesen die XXXV biscop van Uutrecht²³⁰, een man van groter gestadycheit, wijs ende hoech geboren. Ende also dese here Willebrant op die tijt was in IJtalien becommert in des keisers saken, soe worden geordineert wyse notabile mannen, de snelliken over berch trecken souden ende brengen hem dese nijewe tidinge ende die begeerte der ecclesie van Uutrecht, ende hem te presenteren in den hof van Romen. Dwelck also is geschiet, want dye paeus Gregorius dye IX, by rade sijnre cardinalen, soe sette

229 Uutrecth AB.

230 Uurecht AB.

[p. 160v]

hi sinen lieven ende wel bekenden Willebrant van Padenborn te wesen biscop van Uutrecht, hem gevende die benedictie, ende senden eerlicken tot sinen lande ende kercke hem bevolen.