Hoe dat grave Willem destrueerde tcasteel tot Asperen, ende hoe dye biscop van Uutrecht verbrande die stede van Dordrecht.
Dat III capittel.
Onlancs na desen heeft grave Willem groot volc van wapenen vergadert, ende heeft here Folperts casteel tot Asperen belegen, ende heeft sere bestormt, ende wan dat ten lesten, ende destrueerdet tot in den gront. Grave Gherrit van der Are, biscop Dircs broeder, dit vernemende, nam een deel volcs mit hem, ende toech voer de stede van Dordrecht, ende scoten dat vier in die stede, ende verbrande wel dat meeste deel. Ten was niet lange hiernae, grave Willem ende die biscop van Uutrecht en worden verenicht, ende daer wert een soene tuschen hem beiden geseyt, als dat grave Willem den biscop gheven soude voer sine scade die hi gedaen hadde M ponden, ende hi soude Henric die Craen wedergeven sulke goeden als hi hem genomen hadde, om des wille dat hy den grave in vanghenisse leyde bi grave Dircxs bevelen, sinen broeder, als voer gescreven staet. Ende mede souden alle dienstmannen des biscops, die in Hollant woenden, des graven wesen, ende wederom die dienstmannen des graefs, die int Sticht woenden, souden des biscops wesen. Noch soude grave Willem comen mit V C ridders wollen ende bervoet voer den Domkercke tot Uutrecht, ende bidden den biscop dat hyt hem wilde vergheven dat hi in voertijden denselven biscop angetast ende gevanghen hadde tot Staveren in den cloester, dwelcke hi oetmoedeliken volbrocht heeft, allen princen ende vorsten tot een exempel, dat die meeste edelheit staet in der obediencie der geesteliker prelaten.
Auteursrechtelijk beschermd