Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat grave Willem hem bereyde om te conquesteren dat conincrijck van Scotlant, daer hi recht erfghenaem of was.
Dat IIII capitel.

In desen tiden is ghestorven coninc Henric van Scotlant, die een oem was van de-

[p. 156v]

sen grave Willem, sijnre moeders broeder. Ende dat conincrijc heeft een machtich prince uut Scotlant te lene ontfangen van coninc Jan van Engelant. Alsoe dat grave Willem daer daerom toegesproken heeft sijn vrienden ende magen, die hem grote hulpe bygebracht hebben, om sijn rechte erve te helpen becrachtigen, ende versamede vele volcs ende scepen, ende voer over in Scotlant, ende wan daer landen, steden ende sloten. Die grave van Loon vernemende dat grave Willem in Scotlant was, meende hi dat die grave niet lichtelic vandaen scheiden soude, ende versamede weder op een nijeu zijn vrienden ende magen, om daer mede heimelic in Hollant te comen. Dese tidinge hadde grave Willem in Scotlant wesende haest vernomen, hoe dat die grave Lodewyc van Loon hem starck gemaect hadde van luden van wapenen, om in Hollant te comen; waerom hi hem alle der onlede ontsloech van tconincrijc van Scotlant, ende ghinc te scepe, ende is met zeghe weder in Hollant gecomen, omdat hi die graefscappe, zijns vaders erve, dye hy swaerlic mitten swaerde gewonnen hadde ende vrij ende seker besat, niet overgeven en woude om een onsekere erve, noch verloren laten. Ende als die grave van Loon grave Willems coemst uut Scotlant vernam, begaf hy zijn reyse ende opset, ende bleef daer hi was, want hi grave Willems mogentheit seer ontsach. Aldus is grave Willem voertan mit vreden ghebleven, ende heeft sijn vianden ridderliken ende vromeliken uut sinen landen gekeert.