Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Willem, dye XIII grave van Hollant, Zeelant ende Vrieslant.
Dat II capitel.

Willem, deerste²¹² van dijer name, is nu mogende in sijns vaderslant gecomen, ende is geworden die XIII grave van Hollant, Zeelant ende Vrieslant, ende hadde lange tijt te voren oec grave gheweest van Oest-Vrieslant, ende heeft die wapen van Hollant, dye hem suyr geworden is, gevoert, ende Hollant manlicken daermede bescut. Hi hadde te wive Alijt, grave Otten dochter van Gelre, daer hi bi wan Florijs, de na hem grave wert; Otte, biscop van Uutrecht; Willem, stedehouder, vader van jonffrouwe Alijt, dye te man hadde Dirc, die VIII here van Bredenroede ende noch twee dochteren, als abdisse van Reinsburch, ende Rychardis, jonffrouwe van Delft. Dese grave Willem ontfing oec na Ade, sijnre nichten doot, dat graefscap van Hollant te leen van keyser Frederick van Romen die Twede.

212 deeste AB.