Van den oerloge tusschen grave Dirck van Hollant ende grave Otte van Ghelre an deen side, ende den biscop van Uutrecht mit den hertoge van Brabant an dander side.
Dat X capittel.
Dit geschiet wesende, sijn te samen verbonden grave Dirc van Hollant ende grave Otte van Ghelre, grave Willems swager, teghens den biscop van Uutrecht. Die grave van Ghelre creech aan hem alle tlant van Overysel, ende verdreef aldaer des biscops amptluiden ende drossaten, ende besette Deventer mit sinen volc. Ende die grave van Hollant verwoeste alle tlant an dese side der Yselen, ende ghing leggen voer die stadt van Uutrecht, ende belach die al omme. Ende onder desen werdt die grave van Ghelre verradelic gevangen van hertoge Henric van Brabant, doen hi totten Roemschen coninck Otte op een vast geleide reisen soude. Die grave van Hollant dit verhorende, brac op van sinen belegge van der stat van Uutrecht, ende stac alle zijn macht te samen van vele goeder mannen, edele ende onedele, ende quam daermede voer tsHertogenbossche, daer hi mit ghewelder hant in quam opten VI dach van september, ende ving aldaer Willem, den eersten here van Parwijs, ende Henric van Cuyck, des hertogen van Brabants broederen, mit sommige ridderen ende knechten, ende meende mit die gevangen van Den Bossche in Hollant te trecken. Die hertoge van Brabant werts gewaer, ende versamede haestelic van sinen volke, ende hadde in sinen hulpe den aertsbiscop van Colen, den biscop van Ludic, den hertoge van Limburch ende den grave van Vlaenderen. Ende mit desen is die hertoge van Brabant den grave van Hollant gevolcht, om hem sinen gevangen weder te benemen. Ende als grave Dirc dit vernam, dat hem die hertoge aldus vervolchde, dede hi van grootmoedicheit sine bannieren ontwinden, ende vertoefde hem in een dorp dat Hoesden hiet, ende sette hem dair ter were. Mer int eynde, also hem die hertoge te starck van volcke was, wert hi daer gevangen. Nu hevet die hertoge van Brabant in vangenisse beide dese graven van Hollant ende van Ghelre. Ende om des wille, ende oec om dat beide dese landen sonder bescermer oft here waren, heeft de biscop van Uutrecht verworven mit bede ende mit ghifte alle die goede mannen die hi crigen konde, ende toech daermede haestelic in Hollant, ende haelde daeruut enen groten roef, die hi in der avontstont binnen der stat van Uutrecht brochte. Dat ridderscap van Hollant mitter gemeenten zijn den roef nagevolcht, ende hadden avontuer dat si weder vingen een deel ridderen ende knechten van den aftersten; ende si branden in haer wederkeren sommige dorpen in den Stichte. Des anderen dages als dit gesciet was, is dye biscop opgeseten bi rade zijnre luden, ende is gereden mit sine ridderen ende knechten in de Velue, ende verbrande die te mael, ende hi wan die stede van Zutphen, ende toech voert in Deventer, dair hi veel scats creech. Niet lange hierna wert die pays gemaect tusschen grave Dirc van Hollant ende den hertoge van Brabant. Ende die grave gaf den hertoge voer sine scade dye hi hem gedaen hadde II M marc silvers. Ende corts hierna worden die bisscop ende grave Dirc mede versoent, ende bleven voert an alle haer dagen goede vrienden.
Auteursrechtelijk beschermd