Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van here Dirck van der Are, dye XXXII biscop van Uutrecht.
Dat IX capittel.

Dirck van der Are, proest van Mydrecht, wert na deser II biscoppen doot ghecoren die XXXII bisscop van Uutrecht, een hoech geboren man, wijs ende

[p. 152r]

geradich; dese wert ontboden uut Sicilen, daer hi was in des keysers saken, ende quam tot Uutrecht soe hi eerst mochte, ende vant dat bisdom swaerlic beladen van sculde. Waerom dat hi bi rade zijnre heren ende sijns capittels in Oest-Vrieslant reysde, om te besien of hi een precarie ofte bede van den Vriesen vercrigen mochte om hem in sine lasten mede te behelpen. Dit vernam grave Willem van Oest-Vrieslant, die dit meende te wederstaen, ende niet gedogen dat sijn volc ende ondersaten enige scattinge den biscop geven souden. Ende quam tot Staveren in den cloester, aldaer dye biscop was; dien hi, als die misse gedaen was, antaste ende veng hem, om te voeren tot Oesterze, daer hi woende. Sommige monicken ende Vriesen, die hem Goods ontsaghen, waren vervaert, ende beduchten dat si om deser saken willen in den banne comen mochten, ende namen den biscop mit crachte uut des graven handen.