Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen stride, dye graef Dirck hadde tegen den grave van Gelre.
Dat VI capittel.

Ende als grave Dirck ghemaect ende geset was van den keiser een momber ende bescermer des bisdoms, soe toech hij wonen mit alle sinen ghesinne opt slot Ter Horst, ende vergaerde wiselicken des bisdoms renten, als hem die keyser bevolen hadde. Mer overmits des graven raet van Gelre en ontfing hi niet uuten lande van Overysel. Waerom dat grave Dirck versamede uut Hollant ende Zeelant dye vroemste mannen van wapenen, die hi daer wist te wesen, ende toech mit groter heercracht ende ontwonden bannieren in die Velue, ende verbrande alle die dorpen die hi vant, ende nam enen groten roef mit hem van goeden ende beesten. Dit verhorende grave Otte van Ghelre, vergaerde snellicken alle die ridderen heren ende knechten die hi crigen konde, ende vervolchde den grave van Hollant mit groten ghecrye ende blasende basunen, tot Heymensberghe toe, ende meende hem den rove te ontjagen ende te benemen, oft enen bloedigen strijt met hem daerom te vechten, om den smaetheyts willen dye hem ghedaen was. Ende daer

[p. 151v]

gheviel enen harden swaren strijt; want daer bleven dode ende ghewonde luyden, ende ten lesten, als si an beyden siden grote schade hadden, so ontliep die grave van Gelre allencken sijn volc; ende dat vernemende, ruymde hi mede mit enen snellen paerde uuten velde afterwaerts. Grave Dirc die werts ghewaer, ende vervolchde dat vliende volc, ende veng veel ridderscaps ende gemeente volcxs, ende voerde se mit hem ghevanghen.