Van der twist ende twedracht in der electyen van II biscoppen, als Dirck van Hollandt ende Aernt van Ysenburch.
Dat V capittel.
Als here Baldewijn van Hollant, biscop van Uutrecht, begraven was, quamen grave Dirck van Hollant ende grave Otte van Gelre mit gewapender cracht in der stat van Uutrecht, ende sayeden groten nijt ende discoert onder den capittelaers, ende maecten die mannen van der kercken ende die canonicken twedrachtich. Want sommige van den capittelaers coren here Dirck van Hollant, den domproest, des biscops Baldewijns broeder, die ghestorven was, ende desen grave Dircs oem; ende daer bleef getrouwelic bi grave Dirck van Hollant mitter stadt van Uutrecht ende dat Neder-Sticht. Andere van den canonicken coren here Aernt van Ysenburch, proest tot Deventer; ende daer bleef bi grave Otte van Ghelre ende dat hele Over-Sticht van Overysel. Ende als keyser Henric desen twedracht vernam, sende hi grave Dirc van Hollant sinen neve staf ende vingerling, ende sette hem int bisdom ter tijt toe, dat dat geestelicke recht in den hof van Romen getermineert ende geeyndet ware, wie dat bisdom van hem beyden behouden soude.
Auteursrechtelijk beschermd