Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van eenre compositie die keyser Henric die VI maecten tusschen biscop Baldewijn van Uutrecht ende den hertoge van Brabant.
Dat IIIB¹⁹⁰ capittel.

Also hier voir gescreven staet, dat die hertoge van Brabant versuymt hadde sijn leen te versoeken an den biscop van Uutrecht ( dat is die Velue mit sinen toebehoren ( ende si daer groot oerloge tegen malcander om gehadt hadden, soe heeft keyser Henrick dese sake an hem ghenomen, ende heeft een compositie ende uutsprake daerof ghedaen, ghevende dairof een bulle in deser forme:

In den Name des Heyligen ende Onversceyden Drievoudicheits. Amen. Henrick, by der genaden Goeds keiser van Romen ende coninc van Sicilien, doen te verstaen allen onsen getrouwen des Rijcs, die nu sijn ende namaels wesen sullen, dat wi alsulcken twist ende gheschille als daer lange tijt is geweest tusschen onsen lieven ende getrouwen neven here Baldewijn van Hollant, biscop van Uutrecht, ende Henric, hertoge van Lotrijc ende van Brabant, omme dye graefscappe van der Velue: die biscop allegerende dat dieselve graefscappe overmits keiserlicke ghifte ende donatie onser voersaten hem ende der kercken van Uutrecht toebehorende is; die hertoge seggende contrarie, dat hi dieselve graefscappe van onser majesteyt te lene hout. Ende hebben dit tot sulcker eynden ghebrocht, als dat hi sine onrecht heeft bekent, ende heeft alle recht ende anseggen van der graefscappe dat hi daeran hebben mocht, geheel ende al gheset in onsen handen. Waerom hebben wi uut onser keiserlicke goedertierenheit dese graefscappe van der Velue mit allen sinen toebehoren ghegont ende gegeven here Baldewijn van Hollant, biscop der selver kercken van Uutrecht, onsen neve, ende met onser keiserlicke mogentheyt ende privilegie dat gheconfirmeert. Ende die biscop heeft dese graefscappe wederom verlijt ende verleent in onsen tegenwoerdicheit onsen lieven ende getrouwen neve hertoge Henric van Lotrijc ende van Brabant, ende sal voert erven op sinen zoene oft dochter vry ende geheelic. Ghebieden daerom dat nyement nu, noch hier namaels, dese onse ordinantie ende uutsprake vermet te breken ende ter contrarie doen. Ende so wie des attempteerde soude verboeren ende gehouden wesen te betalen C pont gouts, deen helft onser cameren, ende dander dien dongelijck gheschiet ware. Tot welcker kennisse wi desen brieve hebben doen scriven ende besegelen mit onsen gulden zegele, int jaer Ons Heren M C ende XCVI, opten II nonas van maert. Ghegheven tot Ghelenhusen.

190 dit is het tweede derde capitel.