Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die XIIII divisie, ende heeft XI capittelen.

Paeusen.
Anno M C XCII.

[p. 148r]

Dat eerste capittel.

Celestinus die III was die C LXXXIIII paeus, een Romein, ende sat VI jaer ende VIII maenden. Hi wert opten Paesdach ghecroent, ende des dages daeraen croende hy den keyser Henric den VI. Hi dede vele scone husen ende palaesen maken bi Sinte Pieters ende Sint Jans kercken. Ende als hi doot was, wert hi tot Sinte Pieters begraven.

Innocencius die III was die C LXXXV. paeus, uut Campanien, ende sat XVIII jaer, VII maenden ende XXIIII dagen. Hi was een groot geleert ende glorioes man in der Heyliger Scriften. Hi dede maken ende fonderen¹⁸⁶ bi Sinte Pieters kerck een groot schoen hospitael ofte gasthuys in die ere des Heiligen Gheests, dwelck Sixtus, paeus, die IIII, namaels seer verbetert heeft ende vernyewet, ende mit vele scone gracien ende oflaten begavet. Hi gaf elcke kercke binnen Romen een pont silvers tot restauratie ende vermakinghe hore kelcken. Hi croende den keyser Otto die IIII. Ende als hi vele goede ponten ende wercken in der Heyliger Kercken volbrocht hadde ende ghedaen, starf hij tot Perusen, ende wert dair begraven.

Item. Dese paeus Innocencius die III hadde een concilium tot Romen, tot Sint Jans te Latranen, om dat Heylige Lant weder in te winnen. In dit concilium waren XIII C prelaten, mitten patriarchen van Jherusalem ende Constantinopolen; aertsbisschoppen LXX; biscopen IIII C ende XII; abten ende prioren VIII C; die legaten der keyseren van Romen ende van Grieken, der coningen van Jherusalem, Vrancrijc, Spangen, Enghelant ende van Cypers. Daer wert veel opgedaen ende proponeert, mer niet en werter gesloten, want die Pisanen ende Genuesers in groter twisten tegen malcander opstonden van¹⁸⁷ sommige statuten ende regulen den geestelicken ende leken luyden angaende, om hoer leven in goeden state te brengen.

186 fouderen AB.

187 dan AB.