Hoe die keyser in een riviere verdranck, ende van graef Florijs' doot van Hollandt ende grave Phillips van Vlaenderen.
Dat XIII capittel.
Daerna, in den jare Ons Heren M C ende XC, geschiedet dat die keyser in den zomer, alst seer heet was, ende hy vermoeyt was in den weghe, ghing in eenen rivier om hem van den swete te reynighenGa naar voetnoot185 ende te dwaen, ende hem wat te vercoelen; ende verlyet hem daerop, dat hi wel zwemmen konde, ende quam in den stroom, die so groot viel, dat hi den keyser werp tegen een clippe onder dat water, dat hy verdrencte, als dye heremijt ende abt voergeseyt hadde ende propheteert. Ende wert mit groter rouwen begraven in Sinte Pieters kerck in der stat van Anthiocien. In den selven jare worde oec sieck die vrome prince graef Florijs van Hollant, ende starf dair mede, ende wert mit groter wenen begraven by des keysers tombe. Ende Willem, die des voirseyde graef Florijs jonger zoen was, versellede hem met hertoge Frederick van Swaven, ende was bi hem na sijns vaders doot VI jaer lang, die in veel striden die si teghens den heydenen hadden dicwils victorie hadde. Dese grave Florijs berechte die graefscap van Hollant, Zeelant ende Vrieslant XXVII jaer lang. Ende die graefinne Ade, zijn wijf, starf na hem, int jaer Ons Heren M CC ende VIII, opten III dach in januario, ende wert mit groter eren begraven tot Middelburch in Zeelant, in der abdien. Die grave Phillips van Vlaenderen was noch bi den anderen princen int Heylige Lant gebleven, ende worde op eenre tijt in enen stride sere ghewont, daer hy of starf. Dit verhorende zijn huysvrouwe, dede dat lichaem vandaen halen, ende dede dat eerlick begraven in der abdien tot Clarenvalle.
Auteursrechtelijk beschermd