Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen groten cruysvaert geordineert opten Saracenen int Heylighe¹⁸² Lant, ende hoe die stede van Haerlem haren wapen cregen.
Dat XII capittel.

Hierna, in den jare Ons Heren M C ende LXXXVIII, Alexander, die paeus van Romen, die III, Frederick, keiser van Romen, dye eerste, hebben geboden ende ingeset een generale cruysvaert, om weder te recupereren ende in te winnen die Heilighe stat van Jherusalem. Ende sende tot Mens opten Rijn een legaet, genoemt Henric, diet volc in Duytslant soude vergaren; van welcker heervaert die princepail cappeteinen ende princen geweest zijn: Frederick deerste van dier name, keiser van Romen; Phillips, coninc van Vrancrijc; Rijchaert, coninc van Engelant; die hertogen van Beyeren ende van Sassen; Coenraet, hertoge van Oestenrijc; Frederic, hertoghe¹⁸³ van Swaven; Henric, hertoge van Lottrijck ende Brabant; Phillips, grave van Vlaenderen; Florijs, graef van Hollant; Dirck, graef van Cleve; Otte, grave van Ghelre, met veele an-

182 heylihe AB.

183 hertohe AB.

[p. 147v]

der vorsten ende princen. Comende in Calabren, vraechde die keyser Frederick van den abt Joachim, die seer gheleert was in die Heylige Scriften, ende begavet metten Geest der Prophetien, hoe die cruysvaert vergaen ende volenden soude. Hi antwoerde ende seide aldus: 'Op dit pas en sullen die kersten heren niet veel profiteren oft voirtgaen int Heylige Lant, want die tijt noch niet gecomen en is, dat God dat Lant van Beloften van den Agarenen wilde verlossen. Ende ghi, keiser, sult verdrencken eer ghi wederom thuyscomet.' Die keyser dit horende, maecte sijn reyse mitten heren voernoemt doer Bulgarien, ende toech boven Sinte Jorijs arm omme nat Heylighe Lant. Ende nam crachtelic in vele steden ende sloten totter woestinen toe Sur genoemt. Mer die Heilighe Stat van Jherusalem en mocht hi niet crigen, na der prophetien des abts Joachims voerseit; waerom dat hy beleyde den starcken stat van Egipten, geheten Damiaten, gelegen opter rivieren van der Nyle, om altijt een haven te hebben int Heylige Lant te comen. Mer want die stadt seer starck was van toernen, ende bysonder op dye haven int ancomen van der stadt, want daer ysere ende sware metalen raexen ende ketenen onder dat water ghinghen, van denen toerne totter andere, mits welcken dye haven¹⁸⁴ ende die stat onwinlic was, ende die burgheren des te stouter. So heeft ten lesten Willem, grave Florijs' ander zoen, mit die van Haerlem eenen nyewen raet ghevonden, ende dede maken onder an den rugghe van sijn schip een stalen sage mit scarpe tanden, ende verwachte den wint ende stroem; ende quam crachtelic ghezeylen op die kettenen van der haven, ende overmits den groten last vant schip, borsten dye ketten an stucken, ende brochten also alle der kersten princen schepen in die haven van der stat van Damiaten. Die keyser anmerckende dat alsulken swaren ende onwinlicken stat doir cloecheit ende wijsheit Willems, graef Florijs' soen, inghenomen was, begaefde hy hem mit keyserlicke ghiften, ende maecte hem ridder, ende beval den princen ende graven van Hollant onder des keysers bannyer te rusten ende te staen. Voert gaf hi den vromen kempvechters ende poorters van Haerlem totten IIII sterren, dye si in hoer schilt voerden, een silveren swaert, ende die patriarch van Jherusalem gaf hen daertoe dat cruys, omdat si hem also cloeckelic ende vroem gehat hadden int Lant van Beloften ende int innemen van der stadt van Damiaten.

184 hanen AB.