Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dese kersten princen voertreysden tot Jherusalem, ende hoe si van den heydenen anghevochten worden, ende hoe si victorie hadden teghen den onghelovigen heydense coninghen.
Dat XI capittel.

Aldus sijn alle dese heren ende kerstenen princen mitten coninc van Slavonyen gheseylt tot Accon. Ende die coninc Ingelram van Accon, mitten coninc Juwijn, oft nu Joris, van Slavonien, screven an den soudaen van Babilonien om salveconduyt ende gheley voer desen kerstenen princen tot VI M man toe, om te gaen tot Jherusalem ende totten berch van Zinay. Dwelck dye soudaem hem admitteerde ende consenteerde, behoudelic dat si gaen souden als pelgrims onghewapent. Comende tot Jherusalem ontfinc se die Patriarch van Jherusalem mit groter eren, ende leyde se tot dat Heylige Graf Ons Heren, ende totten anderen heylighen steden. Ende haer beverden met groter devocien ende ynnicheden ghedaen, ende dat waerde Heylige Sacrament ontfanghen hebbende, worden si gheleyt op vrouwe Zybelien ende vrouwe Zophie graven, haer moederen, ende reysden doe voert na den berch van Zinay, te versoecken dat graf des heyligen maget Sinte Katrinen. Dit vernemende die coninc van Jherusalem, genoemt Agyla, een saraceen, heeft geordineert ende geset sinen broeders bastertszoen coninc van Abilinen, genoemt Nobiliter, mit V M gewapende Saracenen, om desen kerstenen princen int wederom comen van den berch Sinay te bestriden ende doot te slane. Die princen dit vernemende en quamen by der Jordanen niet, mer namen horen wech na der stat van Cesarien, daer die rivier van der Jordanen horen oerspronc nempt, by den berch Lybaen. Dit vernemende die bastart, gheboet sijn heer te trecken na den berch Lybaen, om te voercomen ende den wech te benemen dat si tot Accon niet en quamen, ende ontboet sinen oem dat hi hem meer volcs van wapenen soude senden, want die kersten meer volcs bi hem gecregen hadden; waerom hem noch gesonden worden XII M gewapende. Mer des dages te voren, eer si quamen, hadde dese bastert enen strijt tegen den kerstenen, omtrent een mile van Cesarien, als si na Accon reysen wilden. Die kerstene princen dit siende, dat de bastert ymmers op hen comen wilde ende bestriden, sonden si enen herault, hem doende te verstane dat si hadden salveconduyt van den soudaen van Babilonien. Mer die bastert en achtes niet, ende scoerde des soudaens zegel ende brieve, ende dode den bode mit zijn eygen hant. Dit siende die kersten, baden God om gratie ende victorye, ende setten hem vromelic tegen den Saracenen te weer, hoe wel si ongewapent waren, ende behielden die overhant; ende dair worter omtrent III M van den Saracenen verslegen, ende omtrent II C van den edelste van den Saracenen gevangen. Ende grave Phillips van Vlaenderen sloech desen bastaert selver mitter hant doot, ende nam hem sijn wapen, dwelc was enen gouden scilt met enen swarten climmende leeuwe, ende behilt die voertan, ende liet sine oude wapen mitten VIII gheren van lasuer varen; ende die graven van Vlaenderen behouden ende voeren noch opten dach van huyden dye voerseyde wapen mitten leeuwe. Ende die kerstenen namen der Saracenen wapenen, ende deden die an. Ende om te bet tot horen onsculde te comen, so senden si dese gevangen tot Accon, ende dat si die waerheit souden segghen, ende ghetu-

[p. 147r]

ghenisse geven van der violeringe des salveconduyts, ende hoe die bastert des soudaens brief ende zegel met onwaerdicheit hadde ghescoert, ende henluyden bevochten. Ende also die kerstenen niet ghewapent waren, wasser veel ghequest in den stride, ende togen weder binnen Cesarien. Die coninc Abila van Jherusalem ende coninc Nobilioen van Abyline, ghebroederen, vernemende dat haer volc van den kerstenen ter neder waren getogen ende veel verslagen, togen si met groot volc van wapenen verby Cesarien nae Accon toe, omtrent III milen van der stat, ende leyden hem in bosschen ende wildernissen om den kerstenen te verlagen ende doot te slane. Opten IIII dach daerna, als die gequesten kerstenen ghebetert ende van hare wonden ghenesen waren, reysden si van Cesarien ende namen horen wech na Accon, ende vernamen dye Saracenen opten weghe, om hen te bestriden. Dye kerstenen grepen enen moet, omdat si wat bet ghewapent waren van den verslagen heidenen, ende stelden hem in ordinantie, settende al horen hope in God den Here, dair alle victorie van compt, ende riepen altijt met eenen groten ghecry: 'Nu helpe ons God ende dat Heylige Graf.' Ende die graven van Vlaenderen, van Hollant ende van Boenen stonden voir in den strijt, ende dye graven¹⁸⁰ van Ardennen ende van Henegouwen hadden dye afterhoede van theer. Die Saracenen hadden ghemaect III battaelgen, in denwelcken die eerste stont dye coninck Nobilioen van Abylinen, om te wreken sijns bastertzoens doot. Ende dye III graven ghingen hem stoutelicken an, biddende mitter herten, ende roepende mitten monde: 'Nu helpe ons God ende dat Heylighe Graf', ende streden aldus III uren lang mit groter wreetheit; ende ten lesten wert die coninck Nobilioen van sine camele geworpen ter aerden. Ende die grave van Vlaenderen sloech hem mitter hant doot. Ende mit desen cregen die kersten een moet, ende verjaechden dat grote heer, ende versloegen omtrent XI M Saracenen. Mer die princen geboden, dat men den gewonden edelen Saracenen nyet doden en souden, om ghetugenisse te geven voer den soudaen, wat groter injurie ende ghewelt henluyden van desen heydense coningen was gedaen; ende deser wasser omtrent VI C edele Saracenen. Den strijt ghedaen wesende, namen dye kerstenen enen groten roef van gout, silver, cleinoden ende costelicke wapenen, ende beroefden die tenten ende pauweljonen¹⁸¹ der heydenen, lovende ende danckende Gode van der groter victorien, ende quamen aldus tot Accon. Ende si gaven den coninc Ingelram van Accon alle dese gevangen, om sinen belieften ende wille daermede te doen. Ende hi ontfing dese princen mitten gevangen mit groter reverencien ende eren. Ende coninc Jorijs van Slavonien nam doe dese kersten princen voert in zijnre hoeden ende bewaernissen, ende namen oerlof an den coninc van Accon, ende seylden int eylant van Creten; ende die coninc begaefde se mit scone costelicke gaven ende cleynoden, ende besorchde hen goede bereide scepen, wel toegemaect van allen des si behoeftich waren, ende quamen gevaren tot Lisseboen in Portugael, daer si van den coninc grotelic worden festeert ende onthaelt; ende die coninginne, genoemt Machtelt, dede desen heren grote chiere ende ere; ende zijn vandaen gereist elc in zijn lant. Ende die grave Florijs is mit groter eren ende feesten ontfangen in sine landen van Hollant, Zeelant ende Vrieslant.

180 granen AB.

181 panwelionen AB.