Hoe dat grave Phillips van Vlaenderen ende grave Florijs van Hollandt met meer princen pelgrimaedgie reysden tot Jherusalem.
Dat X capittel.
In den jare Ons Heren M C ende LXXX, Phillips, grave van Vlaenderen, van Aelst, Artoys ende Virmandoys, ende Florijs, grave van Hollant, Zeelant ende Vrieslant verhorende hoe dat die mogende soudaen, coninc der Saracenen, dye heilige stat van Jherusalem weder ingewonnen hadde, ende hadde verslagen dye moghende kerstelicke coningen van Jherusalem, Zamarien ende Zirien, broeders Zybelie, dye dees grave Phillips moeder was, sine omen. Welcke Zybelie begraven leyt tot Jherusalem in Sint Jans hospitael, dat is die plaetse dair Lasarus te wonen plach. Soe hebben dan dese II machtige graven, die haer beyder moeders dair begraven lagen, opgenomen ende ingeset mit malcander mit machte van volcke in dat Heilige Lant te trecken, ende versoeken mit devotien dat Heylighe Graf Ons Heren, ende haer moeders graven, ende nemen wraeck van den doot der edelre kersten princen die si verslagen hadden. Dese mare overal hem verspreyende ende gecondicht in vele landen, sijnder gheweest veel andere princen, baroenen, ridderen ende edele mannen, ende bereyden hem met alle hoer macht om mit desen princen te reysen. Dese II princen quamen te samen, ende vergaerden in Vlaenderen haer scepen tot Honsdam, ende dat getal der gheenre dye daer vergadert waren was den hoop omtrent IX M man, alle uutgelesen vrome ende cloecke wapentuers. Ende van desen here waren die opperste cappeteinen Phillips, grave van Vlaenderen; Florijs, grave van Hollant; Willem, grave van Henegouwen; Thiebalt, grave van Ardennen; Matheus, grave van Boenen ende here Pieter, biscop van Camericken. Dese II waren grave Phillips broederen, ende zijn tscepe gegaen ende quamen in corten dagen gezeylen in Spangen, daer si hem wat recreerden ende vermaecten, met hem nemende alle dat hem tot sulcken reise van node wesen mochte. Ende vele baroenen, heren ende ridderen verstaende wat hoer reise was, hebben si hem mit henluyden verselt, ende namen die pelgrimage mede an, ende seilden mit hen in Griecken, Slavonien ende in Cypren. Daer wesende ende vernemende dat die II coninghen van Slavonien ende van Cypren onghelovighe heydenen waren, gheboden si dat al dat heer hem wapenen soude teghens dese twee coninghen. Dit vernemende dye coninck Juwijn van Slavonien, sant notabele ambassaten an den kerstenen princen, begerende mit weinich sijnre heren ongewapent bi hem te comen ende mit hoir te spreken; ende twort hen admitteert ende toegelaten. Ende comende by den princen, sprack hi aldus: 'Ghebenedijt si God, Dye hemel ende aerde ende al datter inne is ghe-
Auteursrechtelijk beschermd