Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van here Baldewijn van Hollant, die XXIX biscop tUytrecht.
Dat IX capittel.

Baldwijn van Hollant, die II van dier name, proest tot Sinte Marien tUtrecht, Oudenzeel, worde eendrachtelic van den capittelaren gecoren ende geconfirmeert die XXIX bisscop van Uutrecht. Hi was een sachtmoedich man, ende seer reyn van leven, dat men vermoet, dat hi maget starf. Wes broeders waren Florijs, grave van Hollant, Dirc, domproest tot Uutrecht, Otte, grave van Bentem, doer welcker heren hulp ende bystant hi alle rovers, straetscenders ende andere rebellen uut sinen Stichte ende landen verdreef, ende berechte dat bisdom glorioselic ende eerlick in groten rusten ende vreden. Alle burgers ontfingen statrecht van hem, ende alle dienstmannen haer officien ende leengoeden. Ende desghelijcs ontfingen alle vasallen ende leenmannen hair leengoeden; sonder alleen dye hertoge van Brabant versumede dat hi die Velue te tijde niet en versochte, die die grave van Ghelre voert te lene hilt van desen hertoge. Waerom die biscop mit cracht in die Velue toech, ende verdreef daeruut grave Gherrit, mit alle sine hulperen. Die grave nam swaerlic dat verlies van so groten heerlicheit, versamede een groot heer van wapentuers, ende beleyde die steden van Deventer IIII dagen lang. Die keiser Frederick deerste dit vernemende, quam neder ende benam den strijt, ende settet in vreden ende bestant lange tijt, ende geboet dat te houden an beiden siden. Ende binnen dier tijt dat die vrede duerde, starf grave Gherrit van Ghelre, ende en liet geen kinder after. Ende die biscop quam anderwerf mit gewapender hant, ende verbrande veel dorpen in dat graefscap van Zutpheen, ende brochte enen groten roef van daer. Grave Dirck van Cleve, die des biscops suster tot

[p. 146r]

¹⁷⁹ enen wive hadde, versamede een groot heer van uutghecoren wapentuers ende ridderscap, ende verwoeste een groot deel van dat graefscap van Gelre. Ende grave Florijs van Hollant dede oec grote scade in den landen van Ghelre, want si alle die beesten dye in die Velue waren dreven si ende brochten in dye stadt van Deventer. Otte, die na Gherit sinen broeder wert grave van Ghelre, versach dat oerloge van sinen vianden dattet altijt mere ende swarer wert, ende dat hi mit zijnre cracht allene also machtige princen nyet en mocht wederstaen, vercreech hi uuten bisdom van Coelen ende van Monster, uut Brabant ende uut dat lant van den Berghe omtrent III M soudeniers, mitten welcken hi beleyde VIII C paerden, dye den biscop toebehoerden, in der stat van Deventer III weken lang. Die biscop, als hi hoerde dat zijn stede ende luyden in noden waren, versamede hi een crachtich heer midts hulpe grave Florijs sijns broeders ende des graven van Cleve sijns swaghers, daer hy grave Otte van Ghelre mede verdriven woude van den belegge voer Deventer. Mer dye keyser Frederijck deerste quam anderwerf nederwaert, ende onderving dat oerloge, ende maecte onder desen princen enen vriendelijcken pays ende vrede, ende sette grave Otte weder in der heerlicheit van der Velue, op alsulcken recht als zijn voervaders daerin gehadt hadden rustelic ende vredelic te besitten, ter tijt toe, dat dye keiser bi rade zijnre princen dairof sentencie ende oerdele gave na recht ende ghevoeghe.

179 C XLIV AB.