Van IIII starcke castelen, die biscop Govert dede maken tot bescermenisse des Stichts van Uutrecht, ende van sijnre doot.
Dat VIII capittel.
Dese eerwaerdige vader ende here Godefrijt van Renen, biscop van Uutrecht, dede tot sijnre ewigher memorien ende loves maken ende timmeren den heyligen Sinte Martijn IIII starcke castelen, als Horst tegens dye graefscap van Gelre; Montfoert tegen die graefscap van Hollant; Vollenhoef tegen die heerscappie van Vrieslant, ende Woerden tegen die rebelheyt sijns eyghen stadts van Uutrecht, opdat hi uut dese IIII castelen sine ende des Stichts sine vianden soude mogen wederstaen ende bedwingen. Noch hierenboven begaefde hy der Heyligher Kercken van Uutrecht, ende gaf die tot een ewich testament die stat van Renen, mit meer andere goeden hem angheerft, dwelcke dye biscoppen van Uutrecht tot noch toe rustelic beseten hebben. Ende na vele goede ende doechdelike wercken die hi den Stichte ende der kercken hadde gedaen, is hi salichlic in den Here gestorven int jaer Ons Heren M C ende LXXVIII, op die VI kalende van junio, als hi dat bisdom vrelick ende eerlick hadde berecht XXII jaer lanc, ende wert mit groter eren ende betamelicker uutvaert begraven in den Domkercke by biscop Baldrijck van Cleve. Dyewelcke II biscopen te loven ende te prisen zijn in der ewicheit om der groter doechden, nutticheden ende profiten, die si der Heiliger Kercken van Uutrecht hebben ghedaen ende bewesen.
Auteursrechtelijk beschermd