Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dye Vriesen rebelleerden teghen grave Florijs ende hoe dat hij se onder sijne subjectye brochte.
Dat V capittel.

Hierna, in den jare Ons Heren M C ende LXVI, anmerkende dye West-Vriesen dat grave Florijs in veel saken becommert was, quamen si mit swaer volc van wapenen over den beeck Ockennoort tot Alcmaer, om te beroven Kenemerlant. Ende namen vechtenderhant die stede van Alcmaer in, naedat si omtrent LXXX poorteren hadden verslegen, die om dit verganclicke leven gecoft hebben dat ewige leven, want sonder twifel, als Catho seyt, ist doechdelic voer tghemeen lant te vechten¹⁷⁶; het is oeck salichlic voer tlant te sterven. Die Vriesen na deser victorien, verbranden heel Alcmaer, uutghenomen die kercke, dien si mit ghesamenderhant ende raet onthielden ongescent ende onghebrant lieten. Grave Florijs dit horende, dochte den Vriesen dit weder te vergelden, ende quam op een harde vorst in den winter, int jaer M C ende LXVIII¹⁷⁷, met een groot heer van volc te Scoerl, om dair raet te houden in wat manieren dat hi Vrieslant soude mogen beheren. Hierenbinnen sijn opgeseten enige stoute ridderen, dat hem nochtans die grave omtryet, ende hebben dat dorp van Scagen verbrant, brengende vandaen enen groten roef van menigherley goeden ende huysraet. Mer die Vriesen, legghende in haer laghen, in ryetbosschen, namen se waer int wederom comen, ende versloegen se byna al ter doot, daer princepalicken sijn ghebleven: Symon van Antwerpen, een uutermaten scoen jongeling; Willem van Voorhout; Baldewijn van Haerlem; Gherrit Spijsdragher; Florijs Ruysch; Allert van Egmont; Bruyn van Castrichom; Gherrit dye Jonghe van Monster, Everaert van Noortwijck. Welcker lichamen vandaen tot Egmont ghebrocht sijn, ende aldair mit groter rouwen begraven. Int navolgende jaer hebben die Vriesen op Sinte Ypolitus dach, die bi hen vierlic is, vergadert een groot heer van volck, ende quamen anderwerf bi Alcmaer, om alle ding weder te vernyelen.

176 aldus De Clerc, p. 58 en C; sterven AB.

177 boven II verkortingsstreep AB.

[p. 144v]

Denwelcken grave Florijs soudeniers sonder merren mitten inwoenres van Kenemerlant te water ende te lande vervolchden, ende sloegen doot in groter woesticheit XXX die alrestarcste van den Vriesen; waerom dye ander voervluchtich worden, ende quamen sonder groten verlies weder in Vrieslant, overmits dat die Hollantsche soudeniers¹⁷⁸ gheen paerden bi hem en hadden, ende oec want dye scutters uut Vlaenderen, dye graef Florijs dienden totter strijt, te laet quamen. Nochtans, onlancxs daernae, is grave Florijs van Hollandt met een grote heervaert in Vrieslant gecomen, ende heeft dye II dorpen als Winkel ende Nyeudorp verbrant, ende met geweldiger hant die III eylanden als Texsel, Wieringen ende tFlye onder sine subjectie gebrocht. Ende nam van hen allen dier in woenden onder die conditye des vredes IIII M marck silvers, ende quam mit groter victorien weder in Hollandt.

178 sondeniers AB.