Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den twist tusschen den bisschop van Uutrecht ende grave Florijs van Hollandt om der heerlicheit van Oestbergen ende Westberghen, gheleghen in Vrieslandt.
Dat IIII capittel.

Daerna, in den jare Ons Heren M C ende LXV, is dair een grote twist ende contentie opgestaen tusschen desen bisschop Godefrijt van Uutrecht ende grave Florijs van Hollant, ter cause van der heerscappie van Oest-Vrieslant. Want sommige der keyseren ende coningen, als Karolus ende Lotharius, hadden voermaels gegeven den princen van Hollant heel Vrieslant totter vloet van der Lauwers toe genoemt. Sommige, nyet minder keyseren ende coningen, als Henric ende Coenraet, hebbent naderhant doer supplicatien der bisscoppen van Uutrecht Sinte Martijn gegeven, als hiervoir staet, mitte bullen daerof gegeven. Waerom grave Florijs voer hem nam dat lant ghehelic te besitten ende den biscop daeruut te verdriven, dien hy onlancxs van sine vianden crachtelic gevrijt hadde, ghemerct dat sine voervaders dye eerste ghifte ende die outste brieven hadden. Die biscop hierom van alle sine vrienden verlaten, begheerde hulp ende bystant van keyser Frederick deerste van dyer namen, teghens den mogenden graef Florijs van Hollant. Die keyser horende des biscops benautheit, quam neder tot Uutrecht, ende maecte een vriendelicke compositie, ende leyde alle twist ter neder, ende vernyewede dye oude vrienscap tusschen den kercke van Uutrecht ende den grave van Hollant, gevende hen beyden een keyserlijcke bulle met deser navolghender tenoer:

In den name des Heyligen ende Onverscheyden Drievoudicheits. Amen. Frederick, by der gracien Goeds keyser van Romen, altijt vermeerder tRijcks. Opdat by lancheyt des tijts die gesten in der tijt geschiet niet en sullen vergaen, ende opdat dye nasaten mogen weten wat daer voermaels geschiet ende by ons ende onsen voersaten ghegeven is, so ist dat wi bi onser ghetrouwen raet ende hof eendrachtelicken ofsnidende den controversie ende twist tusschen den eerwaerdigen vader Godefrijt, biscop van Uutrecht, ende grave Florijs van Hollandt van tgraefschap der Oest-Vriesen, ordinerende hierom tot kennisse der

[p. 144r]

aliancie bi ons ghemaect van tgraefschap der Vriesen voernoemt, dat si tsamen met malcanderen eendrachtelic sullen kiesen, te weten die graef van Hollant ende die biscop van Uutrecht, een graef die van hoerre beyder weghen sal presideren ende sitten int graefscap van Vrieslant voerseyt, dien si beyde presenteren sullen den keyser om van sijnre hant te ontfanghen den ban ende macht te rechten int lant voerseyt. Ende sal doen een eedt, dat hi noch om lief noch om leet noch om enighe ghiften, gracien ende gaven, nyement van hem beyden enighe onghelijck, prejuditie, schade ofte letsel doen sal, noch en sal des eens voerdeel noch profijt meer niet soecken dan des anders. Ende dat si onder hem beyden aldusdanighen grave eendrachtelicken niet kiesen en konnen, so sal die keiser mit sijnre heren raet een kiesen, ende geven hem den ban ende macht te rechten. Ende waert dat den biscop ende grave van Hollant die graef van hem beyden gecoren in Vrieslant of bi den keyser gheset, als voer staet, niet en ghenoechde, soe moghen si hem vernyewen also dicke alst hen belieft. Voertan in der meye, als men te recht sitten sal, nae ouder ghewoenten, sullen tsamen die biscop ende die grave comen in Vrieslant, elcxs mit XXX ridderen, min of meer, na gheleghentheit der saken, ende sullen ghelijck delen alle die renten ende ontfanghen in gheliker partien alle die boeten, profiten ende emolimenten die binnen tjaer ghevallen sijn. Ende die graef van Hollant sal den biscop helpen om te recupereren dat slot te Benthem. Ende ist dat si dit huys voernoemt wedercrighen, soe salt dye bisscop den grave te lene overgheven, behoudelick dat hi een camer ende capelle mit een koeken daerin houden sal, ende altijt sijn inghanck ende uutghanc¹⁷⁵ vryhouden. Ende om dese aliancie ende concordie te onderhouden, soe hebben si my in minen handen gelovet ende overgegeven, dat een yghelick die contrarie dede, mijnre camere geven sal V C marck silvers, binnen den termijn van XX weken.

175 uut uutghanc AB.