ware. Mer hi hadde een dochter, ende dye hadde sonen, diewelcke hem onderwonden van deser burchgraefscappe. Ende om te meer ghestijft ende gestarct te wesen teghen den biscop, hadden si die heerlicheit opgedragen grave Henrick van Ghelre, die se hem weder verleent hadde. Mit welcker hulpe ende bystant si den biscop mit sinen ghesinne ende familie op enen toern belegen hebben, ende souden sonder twifel gevangen ghenomen hebben en hadde hi bi raet ende assistencie grave Dircxs van Cleve te tijde nyet gheruymt. Die grave van Ghelre mitten burgeren ende andere knechten heeft dese burchsaten mit groter assaulten ende dagelixen stormen seer infesteert ende benaut, ende heeft dat zomerhuys ende dat winterhuys verbrant, ende dede oprechten een grote magene om den toern ter neder te worpen. Die biscop, die sere beducht was, ende van nyemant ghenen troest en hadde, heeft met stadiger ghebeden begeert ende vermaent den grave Florijs van Hollant, der kercken van Uutrecht vasalle, hem nu willen te hulpe comen in sinen uutersten node. Dye grave heeft den biscop te wille geweest, ende heeft terstont vergadert een scoen gheselscap van ridderen ende knechten, ende is den biscop grotelick te hulpe gecomen, ende heeft metten biscop die stat van Groeningen alomme mit veel volcs belegen ende dagelicxs mit scutte ende andere instrumenten angestormt. Binnen der stede lagen die grave van Gelre ende here Dirck van Batenburch, die den vianden van buyten vromelic wederstonden. Ende dese twist stont bina aldus een jaer lang, dyewelcke biscop Reinolt van Coelen doer beveel des keyser Fredericxs ter neder geleyt heeft. Ende biscop Godevert ontfing van den neven des voerseiden Lijfrijt III C marck ende hi beleende hem weder van nyewes die burchgraefscap van Groeningen, die starckende mit nyewe privilegien ende vryheden.
Auteursrechtelijk beschermd