Van enen groten storm ende winde ende enen groten brande.
Dat VI capittel.
Int jaer Ons Heren M C ende LXX quam een grote storm van winde in den herfst, so dattet zeewater quam vloyen met groter haest an der statmuren van Uutrecht, also dat men zeevisch, die bolc hiet, vinck in der stat graften van Uutrecht mit zeghenen. Daerna, in den jare M C ende LXXI, opten Kersnacht, worden gesien vele blixemen ende donre gehoert, die uutermaten vervaerlicken luyden, dat alle dieghene diet hoerden verwonderden. Ende des sjaers daernae, soe bloeyden die boemen ende dat gras wies mede in die lenten tijt, meer ende eer dan tplach te wassen, ende die vogelen leiden eyeren ende broyeden omtrent Onser Vrouwen Lichtmisse, ende kipten jonghen in desen landen.
Hierna, in den jare Ons Heren M C LXXIII, wert gestolen dat waerde Heylige Sacrament uut II kercken tot Uutrecht, als uut die Buerkercke ende uut Sinte Jacobs kercke. Ende men en mochte nyet vernemen wiet ghedaen hadde. Daernae, op dye vijfte ydus van meye, quam een swaer plage van water, also groot, dat die vloet alte hant bedecte die aerde, ende mitten harden stroem husen ende boemen ter neder toech, also dat vele vroede luyden waenden dattet een nyewe diluvie soude geweest hebben, ende dat dye werlt anderwerf soude verdroncken hebben. Ende haddet also lange gheduert alst hart van storm was, sonder twifel dye stat van Uutrecht en soude nyet lange hebben mogen staende bliven. Mer die ontfermherticheit Goeds minrede die stroem, ende dat water viel binnen III dagen daerna, soedattet al merckelick weder in die zee keerde, ende alle dorpen die omtrent die zee stonden worden van den groten node ende laste verlost.
Hildebrant, dye eersame abt van Sinte Pouwels tot Uutrecht, die dede een sermoen op Ons Heren Hemelvaerts dach, die daerna quam, ende vermaende dat ghemeen volck dat si alle Gode bidden souden, vasten ende aelmissen gheven souden, opdat God sinen toern woude laten sincken, om dye versumenisse die daer gheschiet was an dat Heylighe Lichaem ons liefs Heren Jhesu Christi, dat uut die II kercken gestolen was, of die stadt soude in corten tiden meer plagen hebben. Die prophetie des eerwaerden vaders en bleef nyet sonder waerheyt, want des selven daghes te vespertijt, soe werdt een grote brant, soedat Onser Vrouwen kerck, die men dye Buerkercke hyet, verbrande, ende dat meeste deel van der stadt van Uutrecht. Waerom here Govert, dye bisschop van Uutrecht, dye hem ontsach Goeds toern, ende hij overdroech mitter ecclesie, ende gheboet alle ghelovighe goede menschen in alle sijn Sticht te vasten op enen sekeren dach. Ende des swoendaghes nae Pijnsteren ghing hij selver metter ecclesie bervoet, ende versocht dye heylighe steden met devocien, biddende dat God Sijnen toern woude laten sincken, ende riep die sancten aen, dat si voer ons bidden wouden.
Auteursrechtelijk beschermd