Hier beghint die XIII divisie, ende heeft XIII capittelen.
Paeusen.
Anno M C ende LXXXIJ.
Dat eerste capittel.
Lucius die III was die C LXXX paus, uut Tusscien, ende sat IIII jaer ende II maenden. Hi hadde grote twist tegen den Romeinen, waerom hi uut Romen toech tot Veronen. Hi was sere naerstich om den princen te verwecken te onderhouden dat Heylighe Lant. Ende als hi aldaer een concilie gehouden hadde, starf hi, ende wert in dye Groote Kercke begraven.
Urbanus die III was die C LXXXI paeus, van Meylanen, ende sat een jaer ende X maenden, XXV dagen. Hi was seer sorchvoudich om den princen van Duytslant tot eendrachticheit te brengen om dat Heylige Lant ende die stat van Jherusalem te beschermen. Mer als hi ghecomen was tot Venegen, ende hoerde daer warachtige tidinge, hoe dat die stat van Jherusalem van den heydenen ghewonnen was, bedroefde hi hem soe seer, dat hij ter doot toe sieck worde; ende liet hem brenghen tot Ferraer. Mer hi starf onderweghen, ende worde daer begraven mit groter eren ende droefheit.
Gregorius die VIII was die C ende LXXXII paeus van Beneventen, ende sat omtrent twe maenden. Hi voer tot Pisen, ende maecte dair vrede tusschen den Pisanen ende Genuersers, dat si mit al haer macht trecken souden om die stat van Jherusalem weder te winnen. Ende hierenbinnen starf hi, ende wert aldaer mit groter wenen begraven.
Clemens die III was die C LXXXIII paeus, een Romein, ende sat III jaer, XVI dagen. By desen paeus tiden was die grote cruysvaert opten Turcken ende heydenen; daer si nyet veel en bedreven, want die abt Joachim te voren geseyt hadde dat die tijt noch nyet ghecomen en was om dat Heylige Lant te winnen. Dese Clemens dede veel goets in der stadt van Romen an vervallen kercken te repareren ende cloesteren te fonderen.Ga naar voetnoot173 Ende als hi doot was wert hi tot Sint Jans te Latranen begraven.
Auteursrechtelijk beschermd