Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)
(2011)–Cornelius Aurelius–
Auteursrechtelijk beschermd
[pagina 143r]
| |
van den Saracenen, mit dat Heylige Graf ende dat Heylige Cruys, om die sonden willen der kersten menschen, ende sonderlinge der sonden van onsuverheit ende gulsicheit; want weinich of luttel menschen warender in cloesteren, ende noch min onder dye waerlicke dye nyet besmet en waren mit die sonden der onsuverheit. Ende want al dat aertrijck mit sonden besmet was, daerom heeft die Heer Sijn volc verworpen. Ende den kerstenen wert toeghelaten van den soudaen, als si uut die stat van Jherusalem ghinghen, dat elck mede mocht nemen dat hi op sijn scouderen dragen mochte; ende aldus ghinghen si een deel tot Anthiocien, tot Thyrus ende Alexandrien, mit horen patriarch, in groter droefheit. Nochtans bleven daer enige kerstenen uut die landen als Surianen, Armenen, Jacobiten, Georgianen ende Grieken, die opten dach van huyden in Jherusalem ende tHeylige LantGa naar voetnoot174 geseten ende woenachtich sijn. Die soudaen, aleer hi in Salomons tempel gaen wilde, dede hi die wasschen mit roeswater, ende na sijnre wet consacreren ende wyen, want hi hilt se besmet wesende van den kersten. Dese soudaen was geheten Saladijn, ende was een cloeck, wijs, vroem man ter wapen; hem en gebrac niet an tijtlicke eer, dan dat hi geen kersten was. Ende als hi doot was, ende men hem ter aerde brochte, hadde hi an een glavie doen hangen een swart cleet. Ende daer ghing een voer mit een hoern blasende, ende roepende: 'Die bedwingher van Asyen, uut alle sine landen ende rijcken en draecht niet mit hem, dan dit swarte cleet', ons kerstenen tot een exempel, dat wi niet mit ons en dragen dan onse goede wercken, ende laten dat tijtlick goet hier opter aerden bliven. Item. Dye Heylighe Stadt van Jherusalem was onder der kerstenen dominacye ende besaten dat omtrent LXXXVIII jaer. |
|