Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van heere Harman van Hoern, die XXVII biscop van Uutrecht.
Dat XIX capittel.

Harman van Hoern, die eerst proest was der kercken van Sinte Geroens tot Coellen, wert biscop van Uutrecht in deser manieren: als bisschop Herbert ghestorven was wert grote tweedracht¹⁷² in den capittel, want dye hoechste mannen der kercken van Uutrecht, als Dirck, grave van Hollandt, Henric, grave van Ghelre, ende Dirc, grave van Cleve, baden der ecclesie dat men kiesen woude heere Harman van Hoern, proest van Sinte Geroens tot Coellen, bisscop te wesen tot Uutrecht. Die burghers van Uutrecht ende van Deventer, mitten anderen steden, baden dat men kiesen woude Frederick mitten Hovel. Mer die mogentheyt der groter princen creghen meest gehoers, als dat here Harman also vele stemmen creech als die ander. Ende grave Dirck van Hollant brocht desen Harman int besit van den bisdom, ende maecte hem onderdanich al die hem tegen waren. Daerna II jaer, sende die paeus een cardinael, die daghede beyde dese ghecoren tot Ludick. Ende daer vercreech dese voerseyde heer Harman by denselven cardinael ende den coninck Coenraet dat hij dat bisdom behilt, ende werdt gheconfirmeert ende ghewijt dye sevenentwintichsten bisscop van Uutrecht. Dese bisschop Harman was sacht van sinnen ende goedertieren, soedat in sijne teghenwoerdichheyt dootslaghen gheschyeden,

172 tweeracht AB.

[p. 142r]

want hi en mocht dye burgers van binnen niet bedwingen, dat si hem onderdanich wesen wouden. Ende onder desen biscop Harman begonde die eerste parthye binnen der stat van Uutrecht.