Van enen strijt tusschen den Hollanders ende den Vriesen, ende van bischop Harmans doot.
Dat XX capittel.
In den jare Ons Heren M C ende LV versameden die Vriesen geseten in Drechtenlant, ende quamen mit geweldiger hant in Hollant, ende verwoesten mit groter nydicheit dat dorp van Zande, roevende ende brandende, ende nemende mit hem enen groten swaren rove. Die edele ende vrome riddermannen met andere schiltknechten van Haerlem dit vernemende, sijn mit stouten moede mitten lantluyden van Exdorp desen Vriesen tegemoet getogen. Ende dair geviel een sware strijt tusschen desen II partien, ende daer worden van den Vriesen verslagen omtrent IX C man; ende die ander liepen weder nae Vrieslant, afterlatende alle den roof die si gehaelt hadden. Ende die van Haerlem togen weder binnen haer stede mit groter triumphen ende victorie.
Item des sjaers dairan, als men screef LVI, starf die eerwairdige vader in Cristo here Harman van Hoern, biscop van Uutrecht, als hi dat bisdom eerlick ende doechtlic hadde berecht VI jaer lang, ende wert mit groter eren ende betamelicker uutvaert begraven in Sinte Martijns Domkercke, bi sine voervaderen.
Auteursrechtelijk beschermd