Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen groten brande die tot Uutrecht was.
Dat XVII capittel.

In den jare Ons Heren M C ende XLVIII ontstack die stat van Uutrecht mit enen groten brande, die men niet gelesschen en mochte, ende verbrande bi na altemael; want daer verbrande Sinte Martijns kercke, Sinte Pieters, Sinte Jans ende Sinte Pouwels kercke; mer Sinte Salvatoers kercke bleef onverbrant; ende dier geliken Sinte Stevens outaer. Die eerste capelle, die vast bi Sinte Salvatoirs kercke staet, ende bi Sinte Willeborts tiden gesticht worde in die ere des Heyligen Cruys, die verbrande mede, ende al datter in was, sonder Sinte Salvatoers beelde, dat bleef onverbrant. Nochtans dattet cruys, daert angenagelt was, verbrande altemael, ende die nagelen mede; ende dat beelt wert bruyn in den brande. Doe quam die ecclesie mit groter devocien mit der ghemeenten, ende namen dat heylighe beelde, ende brochtent mit groter eren ende waerdicheit, al singende, in Sinte Salvatoers kercke, daert noch staet.