Hoe dat biscop Andries oflivich worde.
Dat XI capittel.
Omtrent dese tijt versette biscop Andries van Uutrecht XII priesteren des kercs van Staveren om hore verdiensten ende quaden regiments ende levens willen, ende brocht daer weder in broeders uuten convente van Oestbroeck van Sinte Benedictus oerde. Dese biscop Andries verwerf van keiser Coenraet die III die confirmacie ende vernieuwinge der ghiften ende donatien der graefscappe van Oestergoe ende Westergoe, tegen der ghiften ende confirmacie die sijn voersaet keiser Lotharijs den graven van Hollant hadde gegeven van derselver graefscappen. Ende als biscop Andries dat bisdom van Uutrecht eerlick hadde berecht X jaer lang, starf hi op die IX. kalende van julio in den jare Ons Heren M C ende XXXVIII, ende werdt tot Uutrecht in der Domkercke mit groter eren begraven bi sine voersaten.
Auteursrechtelijk beschermd