Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den quaden belede ende regimente des convents van Egmont.
Dat XII capittel.

In den jare Ons Heren M C ende XXIIII was een eerwairdich abt tot Egmont, gheheten here Adellaert. Dese hadde doen maken ende timmeren een schone kercke in dat dorp van Egmont in der eeren Onser Liever Vrouwen. Ende als hi gestorven was, werdt hi mit groter eren in der selver kercken begraven onder enen sarcke voer dat choer. Ende also grave Florijs onlancs daer te voren mede oflivich geworden was, ende sine kinderen noch jonck waren, heeft sijn huysvrouwe Petronelle, die graefinne, dat lant angenomen te regeren van hare kinderen wegen. Ende also die abdye tot Egmont op die tijt vaceerde, so sijnder sommige heren hare dienres geweest, die der graefinne also informeerden, als dat si begeerde van den broederen ende heren van Egmont, dat si heren Anselijn, horen cappellaen, ontfangen ende nemen souden tot enen broeder, ende maken hem voert abt van den convente; dwelcke alsoe geschiet is, ende hebben desen Anselijn gemaect monick, ende gecoren tot horen abt, diewelcke een slecht, simpel ende ongeleert man was; ende dit deden si altesamen, opdat sy des convents goeden souden regeren, als si deden. Ende lieten den broeders groot gebreck liden, ende en gaven hem niet haren nootturfte, daer hoere vele seer in verbliden dat si sulcken gebreck leden. Ende om haer ghierichheyt te stoppen onder gedaente des geestelicheits, informeerden si die graefinne dat si dat oude werck van der kercken soude laten ofbreken, wanttet te nauwe ende te enghe was, als si seyden. Ende daer worden gheset drie procuratoers des convents¹⁵⁴, lekenluyden, die meer schenen te wesen gripende wolven dan rechte herders, als Folberdt, abt; Tylgeer; ende Steven. Dese regeerden des cloesters goeden, ende vervolden haer huysen mit des cloesters schat ende goeden; ende namen des cloesters luyden, ende dwongen die te staen onder hoer heerscappie, ende vervolden hoer kisten ende scrinen van des cloesters ghelt ende scat, ende mit desen goeden ende scatte hijlicten si haer kinder, neven, ende nichten, ende maecten se rijck mit des cloesters gheestelicke goeden. Ende mits deser quaden belede sijn des cloesters grote goeden gecomen te nyete. Mer want si dese goeden misbruycten ende niet en vouchden die tottes cloester profijt ende oerber, dairom heeft Hi voir Sine kercke gestreden, Die dair spreect doer den propheet: Die u raect, die raect den bal Mijns oghes; want alle dye dus des cloesters goeden misbruycten, quamen in groter ongevallen, want si allegader binnen tsjaers quader doot ende onversienlick storven: die een in sijn huys, dander opt velt. Want daer staet gescreven: Die den tempel Goeds dissipeert ende qualick regeert, God sal hem weder verstroyen. Dese en waren van God niet vercoren den tempel te destrueren ende weder te repareren ende te maken, want hij en woude niet alleen te geschien die reparacie van timmeringe ende vernyewinge des wercks, mer dat dye grote gebreken der broederen, der zeden, der regulen, des disciplijns ende des religie souden¹⁵⁵ ghereformeert ende verbetert worden.

154 connents AB.

155 sonden AB.