Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat casteel van Sculenburch belegen worde.
Dat XI capittel.

Also hiervoer geseit is, hoe dat die keiser Henric die V biscop Godebalt van Uutrecht gevangen hadde ende uuter gevangenisse gebroken was, so heeft die keiser tot injurie des voerseiden bisscops belegen dat casteel van Sculenburch. Hertoge Lotharijs van Sassen, namaels keiser van Romen, vrouwe Petronellen broeder voerseyt, ende die bisscop van Monster, fautoers ende gonners des bisscops¹⁵³ van Uutrecht, vergaerden tesamen een deel volcs van wapenen om den keiser van desen belegge te verdriven, ende dat casteel te ontsetten; ende stelden hem ter neder niet veer van des keysers heer. Mer dair lach een grote marassce ende broeclant tusschen hen beyden, dat si niet wel tot malcander en mochten comen, te voet noch te paerde. Ten lesten is die hertoge opgebroken ende ghing leggen voir die stede van Deventer opdat die keyser also van den belegghe opbreken soude, ende also een plaetse te vinden om mitten keyser te vechten. Enige van des biscops knechten clommen op die wal-

153 bsscops AB.

[p. 135r]

len vechtenderhant, om also met ghewelt daerin te comen; mer die van binnen weerden hem vromelicken, ende stonden se mit groter cracht tegen, ende toegen weder afterwerts; die keyser dit verhorende brack op van den belegge om die stede te ontsetten; ende aldus worden si verlost, ende dye hertoge quam, ende spijsde dat slot van eten ende drincken ende van alle dat hem van node was, ende reysde weder in sine landen.