Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 132v]

Van der Oerden der Templieren.

Omtrent dese tijt, als die stat van Jherusalem ghewonnen was van den kersten, ende noch vele Turken, heydenen ende ongelovighe Saracenen omtrent die stat ende int Heylige Lant woenachtich waren, so quamen si dicwils als die kerstenen ghingen, ende versochten die heylige steden ende plaetsen, ende overvielen se, ende namen se gevangen, ende doden se bi wilen, ende deden hen grote tormenten ende pinen an. So waren aldaer onder der kerstenen sommige eerbare, devote, vrome ende cloecke mannen uut Duytslant ende andere landen, die hem wapenden, ende reysden mit desen kersten pelgroms over al die heylige steden ende plaetsen, ende bescermden die kersten voer dat anvechten ende overvallen der heydenen. Ende dese maecten een vergaderinge, ende coren enen meester dair si hem onder gaven tot gehoersaemheit, ende begrepen een plaetse ende woenstede in den portalen des tempels, waervan dat si gheheten worden templiers. Dese heren vermenichvoudichden seer, ende cregen grote hulp ende bistant uut die landen der Duitschen ende ander kerstenen landen van tijtlicke goeden ende aelmissen; ende waren den kerstenen seer vrientlic ende bistandich, in alle haer noden ende verdruckingen der heydenen, waerom dat die paeus Honorius die II hen een geestelic habijt gaf, als enen witten mantel over haer overste cleet. Ende Eugenius die III gaf hen daerop een root cruys. Dairna gaf hen Sinte Barnaert een regel, dair si na leefden; ende vermenichden seer in rijcdommen, tijtlicke goeden ende haven, ende timmerden ende fondeerden in allen plaetsen van kerstenrijc vele cloesteren. Alle die heren ende ridderen van desen cloesteren waren waerlicke luden ende voldeden haer getiden mit dat Pater Noster. Hoe dat dese heren van deser oerden gedestrueert ende te niete gedaen worden, sal men hiernae vinden onder den paeus Clemens den V, ende grave Jan van Henegouwen, van Hollant, Zelant, etcetera. Omtrent die jaren M III C¹⁴⁷ ende VI, in den jare Ons Heren M ende XX, began die ridderlicke oerde van den Hospitaliers, der heren van Sint Jans Baptisten. Dese hadden binnen Jherusalem omtrent dat Graf ons Heren een hospitael ofte gasthuys gemaect, daer si den armen sieken kersten pelgroms minlicken om Goeds willen in ontfingen, ende deden¹⁴⁸ grote caritate tegen den armen, ende hadden tot een habijt een swarte mantel mit een wit cruys op die borst; ende voldeden oec haer getiden mitten Pater Noster, ende waren mede alle waerlicke heren ende ridderen. Ende zijn gehouden selver in persone tegen den ongelovige Turcken ende heidenen te striden. Ende als die kerstenen dat Heilige Lant weder verloren hadden, quamen si over in desen landen van kerstenrijck, ende wonnen mit cracht dat eylant van Rodus, als onder den paeus Clemens den V geseit sal worden. Ende als die Templiers vernyelt ende te nyete gedaen waren, cregen si vele van den Templiers goeden, in Duytslant, Vrancrijck ende in anderen landen gelegen.

Item. In desen tiden schenen vierige stralen uuten hemel. Item. In Lomberdien reghendet bloet van den hemel. Item. Die maen heeft haer verwandelt in bloet, des middernachts, alst eclipsis was. Item. In den jare M C ende XXVIII worden vele luden overal ontsteken mitten viere, dat haer leden swart waren als colen. Item. Het was een uutermaten couden lange winter, ende veel menschen, beesten ende vogelen storven van groten honger ende kommer. Etcetera.

147 M tij C AB.

148 deedn AB.