Van den beghinne ende oerspronck der edelre graven van der Marck, ende der graven van den Berge, dat namaels een hertoechdom werdt.
Dat II capittel.
In den jare Ons Heren M C XXII, bij desen keiser Henrics tiden den V, waren twe ghebroeders: die outste was gheheten Adolf, ende dander Everaert, ende waren geboren van den edelen geslachte van Romen, als van den Ursinen. Ende overmits gonst ende liefde die dese keyser Henric tot desen II broeders droech, so heeft se die keyser voersien ende gegeven sonderlinge plecken ende plaetsen gelegen in West-Phalen, die si te voren wel besien hadden om woningen daer te stichten, ende hebben bequame plaetsen daer gevonden. Adolf, die outste, die heeft gefondeert ende getimmert een starck casteel in Wolves Hegghe, dat doe so gemeenlic hiet, ende was by den kant ende frontieren van der graefscappe van Aernsberge. Ende als die grave van Aernsberch dit vernam, dat men sulcken castele maecte an den berch, so heeft hi hen doen vermanen ende seggen dat si dat niet voert timmeren en souden, wanttet sijnre heerlicheyt al te nae stont. Ende dairom wert dit casteel van den timmerluyden ghenoemt Altenae. Daerna heeft die grave van Arnsberch gearbeit om dese broeders te verdriven, ende heeft dat casteel belegen; mer overmits starcheit des casteels, so en heeft hi daer niet op gewonnen. Ende die II broeders, overmits victorie ende rijcheit, so hebben si dit casteel seer vermeert ende verbetert. Ende die ander broeder, Everaert, dye timmerde een casteel geheten Aldenberch, int lant dat nu tlant van den Berge hiet. Ende dese twe gebroeders, Adolf ende Everaert, sijn machtich ende rijck geworden. Ende die keyser heeft se gemaect graven, ende sijn geworden twe graefscappen. Die ene hiet dye graefscap van Altena, dat nu die graefscap van der Marck hiet; ende daer was Adolf voerscreven die eerste graef of. Ende dit graefscap van der Marck quam bi besterfte van eender dochteren die te man hadde graef Otte die XXVI, graef van Cleve, an dat graefscap van Cleve. Ende die ander graefscap hiet die graefscap van den Berghe; ende daer was Everaert dye eerste grave of. Daerna een deel jaren heeft graef Everaert voerscreven sijn heerlicheit aftergelaten, ende is heimelic in een cloester gegaen, geheten Morimont, van der oerden van Cistercien, ende hilt hem daer seer clein ende oetmoedich, ende hi en hadde geen kinder. Ende Adolf zijn broeder nam sijn heerlicheit. Daerna quamen twee ridders uut sinen lande bi dat cloester; ende dese grave Everaert ghing oetmoedelic ende hoede des cloesters vercken. Ende dese twie ridders vraechden hem na den wech; ende si worden hem kennende, dat hi die grave was, by littekenen die si an hem kenden in zijn aensicht. Ende si seydent grave Adolf sinen broeder, horen heer, als si thuys quamen. Ende grave Adolf, als hi dat vernam, so toech hi darwarts ende visiteerde sinen broeder, ende had hem gaern weder uuten cloester gehadt. Mer hij woude daer monick bliven ende God dienen. Mer hi bat sinen broeder grave Adolf, dat hij van sinen casteel van Aldenberghe een cloester woude maken; ende die broeder dede dat gaern. Ende dit casteel lach bi een water geheten dye Dune. Ende daerna is die grave Adolf van Altena ende van den Berge oec een monick gheworden in dat selve cloester, int jaer M C L, ende gaf sijn heerlicheit over Adolf, sinen soen. Ende daerna is Everaert abt in dat cloester gecoren. Ende dit graefscap van den Berge wert een hertoechdom gemaect van keyser Lodewijck van Romen int jaer M III C ende XXXIX, ende quam na bi besterfte an den hertoge Willem van Gulick, die te wive hadde Zophye, marckgrave Aelbrechts dochter van Brandenburch, daer hij an wan een enige dochter die te manne hadde hertoghe Jans outste soen van Cleve ende van der Marck; ende dit was int jaer M IIII C ende XCVI.
Auteursrechtelijk beschermd