Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe grave Dirck onder hem brocht geheel Vrieslant.
Dat VI capittel.

Na desen strijt is mit groter triumphen joncheer Dirck getogen in Hollant, daer hi mit hoger eren ende feeste ontfangen wert ende gehult als een erfheer, ende is geworden die VII grave van Hollant ende Zeelant; mer niet van Vrieslant, want dye Vriesen rebelleerden, ende en wouden den grave van Hollant voirt meer geen homagie noch huldinge doen, noch eet staven. Mer si wouden sitten keyservry. Die grave Dirc dit verhorende, heeft een groot machtich heer van volc van wapenen vergadert, ende is op enen couden harden winter als heel Vrieslant mit yse was bevroren oft steen hadde geweest, getogen in Vrieslant tegens die Vriesen, die hem sine gewoenlike domeinen ende renten niet geven en wouden, seggende dat si keyservry behoerden te wesen. Die Vriesen sijn bieen vergadert, ende quamen den grave ende den Hollanders stoutelicken te ghemoet opten yse, mit groter menichten ende gecrye, mer dat en bate hen niet. Want die Hollanders hadden hem so vromenlicken tegens dese Vriesen, dat sij se afterwerts dreven, vangende ende dootslaende boven die IIII M Vriesen; van welke nederlage die Vriesen sere bedroeft waren, ende vergaerden van nyewes weder een groot heer, om anderwerf tegens den Hollanders te striden. Die grave dit vernemende, vermaende sijn volc tot vromicheden, ende stelde se in goeder ordinancie, wel bewaert wesende mit vele goeder scutten ende archiers; ende ging den Vriesen weder tegemoet, mit ontwonden bannyeren. Daer seer vreselicken wert gevochten omme die overhant; mer int eynde drongen die Hollanders so gruwelicken

[p. 128v]

op die Vriesen, dat si afterwaerts weken; ende dair blevender boven VI M verslagen ende vermoert, waervan dat alle dander Vriesen seer vervaert worden, menende dat het den lesten dach van Vrieslant ware, ende duuterste verderfnisse. Want die grave en spaerde niement, man noch wijf, want si namen se al gevangen, wijf ende kinderen beneden XII jaren, ende dander sloegen si al doot, sonder enighe genaden, verwoestende ende verbrandende alle dair si bi quamen; want hi in meninge was, theele lant te nyete te doen ende te destrueren. Daerna vergaerde hi alle sijn volc, ende beleyde mit groter heercracht die stede van Staveren, ende lach daervoir III weken lang, scietende ende worpende mit bossen ende magenen op die stede, ende bestormde se tot veel plaetsen mit menigherhande instrumenten. Ende als dye poorters sagen dat si des graven mogentheit niet wederstaen en mochten, begeerden si des graven gratie, ende geboden hem op te geven, behouden lijf ende goet. Ende het wert ghedadingt, mer si mosten den grave geven voir hoir rebelheit XIII C gouden Vrancrijcse cronen; mer buyten deser zoenen bleven alle die vreemde gasten ende knechten, dye tot sijnre incoemste alle worden gevangen ende onthoeft. Dit dus geschiet wesende, nam die grave met hem XL poorters uut Staveren tot een onderpant ende borchtocht der penningen die si hem hadden beloeft te geven, ende is mit groter triumphen here geworden van Vrieslant, ende gehult in allen steden ende plecken als sijn voervaders plaghen te sijn.