Hoe dat biscop Coenraet dede fonderen ende maken een collegie in der eren van Onser Liever Vrouwen, ende hoe hi vermoert wert.
Dat XI capittel.
Dese eerwaerdige biscop Coenraet, tot sijnre salichlicker ewiger memorien ende gehoechnisse, was in meninge te fonderen ende stichten an dye westsijde van der stat van Uutrecht een collegiekercke, daer hi een gront also slijkich vandt, dat hi dat fondament van sommige pylaernen niet wel vast fonderen ende setten mochte, overmits die welle van den water. Des was in der metzelaers geselscap een Vriese gheheten Pleberus, ende die vermat hem op sijn lijf dye kerck te fonderen, ende dye pylaernen vast te setten. Mer hi eyschte hierof een alten groten somme van penninghen. Waerom dat die bisschop gaf des Vriesen zoen scone ende costelicke presenten ende milde gaven, also dat hi vernam van den vader die heymelicke konsten; ende hij voltimmerde dye voerseyde kercke in ere van Onser Liever Vrouwen. Waerom dat dye Vriese begreep enen groten haet ende nijt opten biscop, ende overleyde ende peynsde hoe hi hem van leven ter doot brenghen mochte. Ende daerna, in den jare Ons Heren M ende XCIX, als die bisschop misse hadde ghedaen ende was in sijn hof ghegaen, lesende voert sine ghetiden, quam die voerseyde Vriese, siende den bisschop alleen, ende merckende dat hi stede ende stonde hadde, ende doer des viants raet ende ingheven, toech hi sijn messe, ende stack den eersamen biscop doot op die VIII kalende van mey. Ende hij wert mit groter droefheden begraven in dieselve kercke van Onser Vrouwen, die hi ghesticht hadde; ende die Vriese quam ongescaet ende ongelet uuter stat. Mer die keyser Henric die IIII creech hierna desen Vriese gevangen, ende dede hem rechten als hi hadde verdient. Dese eerwaerdighe biscop Coenraet berechte dat Sticht mit groter eren, rustlick ende vrelick XXIIII jaer lang.
Auteursrechtelijk beschermd