Die copie van enen brieve van der ghiften gegeven der kercken van Uutrecht van dye graefscappe van Oest-Bergen ende West-Bergen, gelegen in Vrieslant.
Dat X capittel.
Nu keren wi weder opten biscop Coenraet van Uutrecht die, als hi van den grave Dirck voerseyt van sine vangenisse ontslagen was, ende den grave geresigneert ende weder overghegeven hadde die graefscappe van Hollant mit allen sinen toebehoren, die hi ende sijne voersaet den graven ontweldicht ende mit ondoechtlicke informatie ende anbrengen van den keyser Henrick den vierden vercregen hadden, so en heeft dese biscop Coenraet noch niet ofgelaten, mer heeft van keiser Henrick vercregen ende verworven die graefscappe van Oestergoe ende Westergoe in Vrieslant, die wilen eer die graven van Hollant plagen te gebruken totter riviere van der Lauwers toe, ende die marcgrave Egbert, den princen van Hollant ontweldicht hadde ende crachtelic besat; ende heeft hierof vercregen een bulle ludende aldus:
In den Name des Heyligen ende Onversceyden Drievoudicheits. Henrick die IIII, bi Goeds goedertierenheit keyser van Romen, altijt vermeerder trijcks. Kenlick si alle gelovigen menschen die nu sijn ende namaels wesen sullen, hoe dat wi sulcken rebelheyt als tegen onser keyserlicker majesteyt wylen eer marcgrave Egbert, mitten Sassens, noch een kint wesende, gedaen heeft, gansselic ende gehelic vergeven ende quijtgescouden hebben, gemerct dat hi hem sere veroetmoedicht heeft om onse gratie te verwerven, ende doer sine joncheit des bloets, doer welcke dat hi onser bestaet in maechscappe, alle sine goeden, die wi tot onser tafelen geconfisceert ende toegeslegen hadden, hem dieselfde wederom gherestitueert ende gegeven hebben, ende in meningen waren veel meer te verlenen ende te gheven; welcke marcgrave wederom niet gebruykende enige redene oft voer hem nemende enige rechtvaerdelicke oft merckelicke sake, mer allene uut hoemoedicheyt hem verheffende, gearbeyt heeft ende dagelixs hem stelt in rebelheit teghen onse goedertierlicke majesteyt (boven den eedt ende trouwe die hi ons beloeft ende gesworen hadde), niet alleen onse eer, mer oec ons leven te benemen; ende heeft die Sassens ende Duringers die ons waren versoent, tegen ons conciteert ende opgereet om die van onser gehoersaemheit ende obediencie te treckene. Om welken misdaet ende rebelheit die provinciael heren, Sassens ende Duringers, mit onse anderen princen, die dagelixs onser presencie zijn om recht te plegen, als des noot si, uut rechter justicie die
Auteursrechtelijk beschermd