Van grave Dircs huwelic ende sine geslachte.
Dat VII capittel.
Na dese grote victorie ende triumphe is grave Dirck weder gecomen in Hollant, ende wert daer mit groter eren ende feeste ontfangen. Ende nam corts dairna te wive Witilhilde, hertoge Frederijcs dochter van Sassen, dair hi bi wan Florijs, die na hem grave wert, ende een dochter genoemt Machtelt, hertoechinne van Orliens. Dese grave Dirck was volle oem over coninc Lodewijck van Francrijck, Phillips zoen; ende oem over Baldewijn; graef Bylgen, Kaerl Martelaer Canuten zoen, coninc van Denemarcken; ende Dirck van Elsaten, alle drie graven van Vlaenderen, deen na den anderen. Hi hadde twe susteren, dene was coninghinne van Vrancrijck, dander coninghinne van Denemarcken. Noch had hi IIII broeders, als van sijns moeders wegen alleen die si by den jongen grave Robbrecht die Vriese van Vlaenderen hadde; ende van sijns vaders ende moeders wegen III, als Aelbrecht, Florijs ende Pieter, canonicken der kercken van Ludick, als ghi nu horen sult.
Auteursrechtelijk beschermd