Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den strijt die dese II princen grave Dirck ende biscop Coenraet te samen hadden tot Yselmonde.
Dat V capittel.

Int jaer Ons Heren M ende LXXVI heeft joncheer Dirck van Hollant mit sinen stiefvader Robbrecht dye Vriese vergadert een groot, machtich heer van volc, om te beleggen bisscop Coenraet van Uutrecht, legghende opt slot van Yselmonde. Die biscop dit sekerlic wetende, ontboot dit sine heren ende burgeren van Uutrecht, dat si op enen sekeren benoemden dach bi hem comen souden, ende doen hem ontset ende bystant. Datwelck also geschiet is, ende hebben vergadert veel volcs uut dat Sticht ende anderswaer, ende sijn horen here bigecomen om assistencie ende bystant te doen. Dit heer bi malcanderen comende, sijn si stoutelic tegens malcanderen ingetreden. Die Hollanders mitten Vlamingen weerden hem vromelick, ende dierghelijcken die Stichtse. Mer int eynde cregent die Stichtse te quaet, ende bestonden te wijken, daer veel volcs an beyden siden doot gebleven is, ende vele grote heren ende wapentuers, ende bysonder van des bisscops wegen, dair die vernaemste of waren grave Garlaeck van Zutphen; Lambrecht, proest van Deventer; Volcmaer, priester tot Sinte Bonifaes; Werenboldt ende Ghijsbrecht, ridderen. Uut welcker verlies alle dat heer van Uutrecht verstroeyt worde, ende liepen sonder oerdene te scepe, dair si voer tmeeste deel al verdroncken. Die biscop, angemerct tverlies sijns volcs, dede die voermuren ende poorten van tslot starck maken ende met bossen ende andere instrumenten beleggen om hem te bescermen; mer dye Hollanders doer hulp ende raet der heren ende ridderen uut Hollant, worpen met magenen dat voercasteel ter neder, waerom dat biscop Coenraet uut groter benautheit hem opgaf in des graven handen, ende resignerede thele lant van Hollant, mittet slot van Yselmonde goetwillichlic. Joncheer Dirc, graef Florijs soen, die wederom den bisscop mit groter reverencien sende tUytrecht, ende ontsloech alle die gevangen vry te gaen, sonder enich rantsoen ofte scattinge. In dit beleggen van tslot van Yselmonde bleef dair doot van graef Dircs wegen here Evert van Binchorst, mit vele uutghelesen knechten ende wapentuers; ende here Jan van Arkel wert ter doot toe gequest, ende wert te sceep als een dode thuyswert gevoert, ende starf daerna int jaer van LXXVII opten VII nonas van januario¹³⁷, ende wert tot Arkel in sijns vaders graf geleyt.

137 janurio AB.