Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Der Chartuser oerden beghin.

In den jare Ons Heren M ende LXXXVI began die heilige oerde van den Carthusers doir een groot mirakel datter gesciede van enen hogen geleerden meester ende doctoer in der stat van Parijs, die uuten rechtvaerdigen oerdel Goeds hem selven seide verdoemt te wesen, uut welcken woerden een groot geleert doctoer in der Godheit, geheten meester Bruyn, geboren van Coellen, die werlt gelaten heeft, ende is gecomen in der woestinen die Carthusia heet, mit noch VII andere gheleerde mannen, ende begonnen aldaer een cloester, ende noemden¹³⁶ dat Carthusia. Dese oerde heeft Urbanus die II, Alexander die III ende IIII mit meer andere paeusen gheconfirmeert, ende met veel privilegien gheapprobeert ende gheconfirmeert; want dese oerde alleen is houdende dye opperste digniteyt ende waerdicheit; niet na der outheit des tijts, mer na der strengicheits des levens.

Omtrent dese tijt, als int jaer M ende XCVIII, began die heylige oerde van Cistercien van eenen abt van Molinen, gheheten Robbertus, die dat eerste cloester fondeerde, int bosch van Cistercien gelegen int hertoechdom van Borgondien, daer Sinte Barnaert mit noch XXX jongelingen in den jare M C ende XII dat habijt angenomen heeft, ende fondeerde binnen sinen leven C ende LX cloesteren; waerom datter oec Sinte Barnaerts oerden geheten is, ende heeft wel XXXIII C abdyen onder hem, dair vele heylige mannen in geweest sijn, die dye regule seer scarperlijck onderhouden hebben; ende onderhouden dye regule van Sinte Benedictus met meer andere constitutien ende exemptien daertoe ghedaen.

136 Aldus A; voemden B.