Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Wanneer die stat van Jherusalem van den kersten gewonnen wert.
Dat II capittel.

In den jare Ons Heren M ende XCVI, so versaemden uuten westen, als uut Vrancrijc, Vlaenderen, Normandien, Engelant, Piccardien, Duytslant, Vrieslant, Brabant ende andere meer landen vele grote heren ende vorsten, geestelic ende waerlic, daer die overste of waren die biscop van Puys als legaet van den paeus; Govert, hertoge van Bulioen ende van Lottringen; Eustaes ende Baldewijn, zijn broeders; Robbrecht, grave van Vlaenderen; Rodolp, grave van Mets; Huge die Groot, des coninc Phillips broeder van Vrancrijck; Steven, graef van Bloys; Raymont, graef van Sinte Gyelis; Boemont, hertoghe van Poelgen; Robbrecht, hertoge van Normandien, Willems soen van Normandien, dye nu coninc van Enghelant gheworden was, mit uutermaten veel volcks uut alle natien ende landen van kerstenrijck, tot III C M toe; ende sijn gepasseert doer Hongerien ende tWout van Bulgerien tot Constantinopelen toe, dair si overvoeren int lant van Bithimien, daer si enen strijt hadden daer vele heydenen verslagen worden. Ende die grote steden als Nicea ende Laodicia worden gewonnen. Daerna togen si voer die stat van Anthiochien, dye si mede wonnen, daer si bi openbaringe, die een slecht lantman gedaen was van Sinte Andries, vonden in Sinte Pieters Kerck die lancie oft spere, daer ons liefs Heren side mede doersteken was; ende mit dese spere ghingen si haer vianden tegemoet, dair si grote victorie of hadden. Ende worden verlost van den groten swaren duertijt ende honger, die si lange tijt geleden hadden. Doen togen si voert mit groter macht na die heylige stat van Jheru-

[p. 127v]

salem, die si alom beleyden, ende wonnen die met vechtender hant opten Dach van der Apostelen Sceydinge, int jaer Ons Heren M ende XCIX, daer si enen groten swaren strijt hadden; daer alsoe vele Turcken ende heydenen verslegen worden, dat men totten anclaeuwen int bloet stont. Als nu die stat gewonnen was ende gereynicht, doe bereiden hem die princen ende heren mit al dat volc te versoecken dat Heylige Graf ons Heren, daer si so vele om gedaen ende geleden hadden, ende versochten dat mit also groter oetmoedicheit ende innicheit, dat si meer schenen te crupen dan te gaen. Dat gedaen sijnde, ordineerden si enen patriarch, ende doe hilden si raet om een coninc te maken, ende die stat mittet lant daer omtrent in den gelove te onderhouden, ende coren daer eendrachtelicken hertoge Govert van Bulioen ende van Lottringen, die uut groter oetmoedicheit niet mit eenre gulden crone gecroent woude wesen, mer mit enen doornen crone. Ende als die andere princen hem bereyt hadden om weder thuys te trecken, quam die coninc der Saracenen mit C M paerden ende XL M man te voet tot Ascolenen, om den kerstenen te bestriden; denwelken dat heer ons Heren te moet quam mit V M paerden ende XV M voetgangers, ende God street voer hen; ende die Saracenen worden vluchtich, ende dair bleven C M heiden verslagen, ende II M in der poorten van Ascolonen versmoert. Dit gesciet wesende, bleef die coninc Godevert aldaer, ende regeerde een jaer, ende starf; ende die ander heren togen al meest weder tehuyswert. Van desen cruysvaert is een boeck gescreven, geheten: Die destructie van Jherusalem, dair men alle die historie int lanc besceidelicken vinden ende lesen mach.

Item. In desen tiden geschieden vele wonderlicken dingen, als een grote watervloet die grote scade dede. Item. Die tamme vogelen worden wilt, ende vlogen in der lucht. Item. Grote ende lastige pestilencien. Item. In Engelant was een grote aertbevinge datter tot Lonnen wel V C husen verdestrueert worden. Item. Grote duertijt mit vervaerlicke geluyden van donreslagen ende blixemen. Item. XV daghen vloeydet bloet. Item die duvel sprac den menschen toe in een dorp dat men hem besceydelicken sach.